Non stick utensils-Are they safe?

02-03-2012 ಉದಯವಾಣಿ ಪತ್ರಿಕೆಯ ಮಹಿಳಾ ಸಂಪದದಲ್ಲಿ ಪ್ರಕಟಿತ ಲೇಖನ 
 ಅಂಟು ನಿರೋಧಕ ಪಾತ್ರೆಗಳನಂಟು ಹಿತಕರವಲ್ಲ!

ತಮ್ಮ ಆರೋಗ್ಯದ ಬಗ್ಗೆ ಅತಿಯಾದ ಕಾಳಜಿಯುಳ್ಳ ಜನರು, ತಾವು ದಿನನಿತ್ಯ ಸೇವಿಸುವ ಆಹಾರಪದಾರ್ಥಗಳಲ್ಲಿ ಎಣ್ಣೆ, ಬೆಣ್ಣೆ,ವನಸ್ಪತಿ ಮತ್ತು ತುಪ್ಪಗಳ ಬಳಕೆಯನ್ನು ಕಡಿಮೆ ಮಾಡುವ ಸಲುವಾಗಿ ಅಂಟು ನಿರೋಧಕ ಪಾತ್ರೆಗಳನ್ನು (ನಾನ್ ಸ್ಟಿಕ್ ಕುಕ್ ವೇರ್) ಬಳಸುತ್ತಾರೆ. ಆದರೆ ಇತ್ತೀಚಿಗೆ ನಡೆಸಿದ್ದ ಅಧ್ಯಯನ ಹಾಗೂ ಸಂಶೋಧನೆಗಳಿಂದ ತಿಳಿದುಬಂದಂತೆ, ಇಂತಹ ಪಾತ್ರೆಗಳನ್ನು ಅಡುಗೆಗಾಗಿ ಬಳಸುವುದು ಆರೋಗ್ಯದ ದೃಷ್ಟಿಯಿಂದ ಹಿತಕರವಲ್ಲ ಎನ್ನುವ ಬಗ್ಗೆ ಸಾಕಷ್ಟು ವಾದ ವಿವಾದಗಳು ನಡೆಯುತ್ತಲೇ ಇವೆ. ಜಗತ್ತಿನ ಅನೇಕ ರಾಷ್ಟ್ರಗಳ ಜನರು ತಾವು ಬಳಸುತ್ತಿದ್ದ ಅಂಟು ನಿರೋಧಕ ಪಾತ್ರೆಗಳ ನಂಟನ್ನು ತ್ಯಜಿಸಿದ್ದು, ಹಿಂದೆ ತಾವು ಬಳಸುತ್ತಿದ್ದ ಸಾಂಪ್ರದಾಯಿಕ ಪಾತ್ರೆಗಳನ್ನೇ ಮತ್ತೆ ಬಳಸಲು ಆರಂಭಿಸಿದ್ದಾರೆ. 

ಭಾರತೀಯ ಶೈಲಿಯ ಸಾಂಪ್ರದಾಯಿಕ ಖಾದ್ಯಗಳ ತಯಾರಿಕೆಯಲ್ಲಿ ಎಣ್ಣೆ,ಬೆಣ್ಣೆ,ವನಸ್ಪತಿ ಮತ್ತು ತುಪ್ಪಗಳನ್ನು ಧಾರಾಳವಾಗಿ ಬಳಸುತ್ತಾರೆ. ಇಂತಹ ಆಹಾರಗಳ ಅತಿಯಾದ ಸೇವನೆ,ಆಧುನಿಕ ಜೀವನಶೈಲಿ,ನಿಷ್ಕ್ರಿಯತೆ ಮತ್ತು ಅನುವಂಶಿಕತೆಗಳಿಂದಾಗಿ, ನಮ್ಮಲ್ಲಿ ಅಧಿಕ ರಕ್ತದೊತ್ತಡ,ಹೃದಯ ಮತ್ತು ರಕ್ತನಾಳಗಳ ಕಾಯಿಲೆಗಳು ಮತ್ತು ಮಧುಮೇಹ ಇತ್ಯಾದಿ ವ್ಯಾಧಿಗಳ ಬಾಧೆ ಹೆಚ್ಚುತ್ತಿದೆ. ಈ ಅಪಾಯಕಾರಿ ಕಾಯಿಲೆಗಳ ಸಂಭಾವ್ಯತೆಯನ್ನು ಕಡಿಮೆಮಾಡಲು ಅಥವಾ ಉದ್ಭವಿಸಿದ ಬಳಿಕ ನಿಯಂತ್ರಿಸಲು ಅಥವಾ ನಿವಾರಿಸಲು,ಔಷದಗಳ ಸೇವನೆ,ದೈನಂದಿನ ವ್ಯಾಯಾಮಗಳೊಂದಿಗೆ ಅಹಾರಸೇವನೆಯಲ್ಲಿ ಕಟ್ಟುನಿಟ್ಟಿನ ಪಥ್ಯವನ್ನು ಪರಿಪಾಲಿಸುವುದು ಅತ್ಯವಷ್ಯಕವೂ ಹೌದು. ಅನೇಕ ವಿದ್ಯಾವಂತರು ಇಂತಹ ಸನ್ನಿವೇಶದಲ್ಲಿ ಕೊಬ್ಬಿನ ಅಂಶಗಳಿಂದ ಸಮೃದ್ಧವಾಗಿರುವ ಜಿಡ್ಡಿನ ಪದಾರ್ಥಗಳ ಸೇವನೆಯನ್ನು ನಿಯಂತ್ರಿಸಲು ನಾನ್ ಸ್ಟಿಕ್ ಪಾತ್ರೆಗಳನ್ನು ಬಳಸುತ್ತಾರೆ. ಆದರೆ ಈ ಪಾತ್ರೆಗಳ ಬಳಕೆಯು ನಮ್ಮ ಆರೋಗ್ಯದ ದೃಷ್ಟಿಯಿಂದ ಅಪಾಯಕಾರಿ ಎನ್ನುವ ವಿಚಾರಕ್ಕೆ ಸಾಕಷ್ಟು ಪ್ರಚಾರ ದೊರೆಯದ ಕಾರಣದಿಂದಾಗಿ,ಇವುಗಳ ಮಾರಾಟ ಮತ್ತು ಬಳಕೆಗಳು ಅನಿರ್ಭಂದಿತವಾಗಿ ಸಾಗುತ್ತಿದೆ. 

ವಿಶ್ವವಿಖ್ಯಾತ ಅಂಟು ನಿರೋಧಕ "ಟೆಫ್ಲಾನ್ "ನ ತಯಾರಕರಾದ "ಡು ಪಾಂಟ್ " ಸಂಸ್ಥೆಯ ಉತ್ಪನ್ನಗಳ ಪುಸ್ತಿಕೆಯಲ್ಲಿ, ಈ ಪಾತ್ರೆಗಳನ್ನು ಪಕ್ಷಿಗಳ ಪಂಜರವನ್ನು ಇರಿಸಿದಲ್ಲಿ ಬಳಸದಂತೆ ಎಚ್ಚರಿಕೆಯನ್ನು ನೀಡಲಾಗಿದೆ. ಏಕೆಂದರೆ ಇದು ಪಕ್ಷಿಗಳಿಗೆ ಮಾರಕವೆನಿಸುವ ಸಾಧ್ಯತೆಗಳಿವೆ. ಆದರೆ ಇದು ಮನುಷ್ಯರಿಗೆ ಮಾರಕವಲ್ಲ ಎಂದು ಸಂಸ್ಥೆ ಘೋಷಿಸಿದ್ದರೂ, ಅಂಟು ನಿರೋಧಕ ಪಾತ್ರೆಗಳನ್ನು ಬಿಸಿಮಾಡಿದಾಗ ಉತ್ಪನ್ನವಾಗುವ ವಿಷಕಾರಕ ಪರ್ ಫ್ಲುರೋ ಒಕ್ಟನೋಯ್ಕ್ ಎಸಿಡ್ (PFOA) ನ ಧೂಮವು ಕೆಲವೇ ನಿಮಿಷಗಳಲ್ಲಿ ಪಕ್ಷಿಗಳ ಮರಣಕ್ಕೆ ಕಾರಣವೆನಿಸಬಹುದಾದಲ್ಲಿ, ಸುದೀರ್ಘಕಾಲ ಈ ಧೂಮವನ್ನು ಸೇವಿಸುವ ಮನುಷ್ಯರಿಗೂ ಹಾನಿಕಾರಕವಾಗಿ ಪರಿಣಮಿಸಬಹುದು. 

ಪಿ ಎಫ್ ಓ ಎ ಎನ್ನುವ ಕೃತಕ ರಾಸಾಯನಿಕವನ್ನು ಅಡುಗೆಗಾಗಿ ಬಳಸುವ ಪಾತ್ರೆಗಳಿಗೆ ಅಂಟು ನಿರೋಧಕತೆಯನ್ನು ನೀಡುವ ಸಲುವಾಗಿ ಲೇಪಿಸಲಾಗುತ್ತದೆ. ಈ ಪದರವನ್ನು ಪೊಲಿಟೆಟ್ರಾಫ್ಳುರೋ ಇಥೈಲೀನ್ (PTFE) ಎಂದು ಹೆಸರಿಸಿದ್ದರೂ,ಇದು ಟೆಫ್ಲಾನ್  ಎನ್ನುವ ವಾಣಿಜ್ಯ ನಾಮಧೇಯದಿಂದ ಪ್ರಖ್ಯಾತವಾಗಿದೆ. ನಾನ್ ಸ್ಟಿಕ್ ಪಾತ್ರೆಗಳ ಪದರದಲ್ಲಿ ಪಿ ಎಫ್ ಓ ಎ ಇರದಿದ್ದರೂ,ಇವುಗಳನ್ನು ತುಸು ಅಧಿಕ ಉಷ್ಣತೆಗೆ ಗುರಿಪಡಿಸಿದಾಗ ಇದು ಅನಿಲರೂಪದಲ್ಲಿ ಪ್ರತ್ಯಕ್ಷವಾಗುತ್ತದೆ. ಅಮೆರಿಕದ ಪರಿಸರ ಸಂರಕ್ಷಣಾ ಸಂಸ್ಥೆಯ (EPA) ವೈಜ್ಞಾನಿಕ ಮಂಡಳಿಯು ಪಿ ಎಫ್ ಓ ಎ ಯನ್ನು ಮನುಷ್ಯರಲ್ಲಿ ಕ್ಯಾನ್ಸರ್ ವ್ಯಾಧಿಗೆ ಕಾರಣವೆನಿಸಬಲ್ಲ ದ್ರವ್ಯಗಳ ಗುಂಪಿನಲ್ಲಿ ಸೇರಿಸಿದೆ. 

ಅಮೆರಿಕದ ಇ ಪಿ ಎ ಸಂಸ್ಥೆಯು ಪಿ ಎಫ್ ಓ ಎ ರಾಸಾಯನಿಕವು ಪ್ರಾಣಿಗಳಿಗೂ ಕ್ಯಾನ್ಸರ್ ಕಾರಕವೆನಿಸುವುವುದೆಂದು ವರ್ಗೀಕರಿಸಿದ್ದು, ಈ ರಾಸಾಯನಿಕವು ಇಲಿಗಳಲ್ಲಿ ಯಕೃತ್,ಪ್ಲೀಹ, ಸ್ತನ ಮತ್ತು ವೃಷಣಗಳ ಕ್ಯಾನ್ಸರ್ ಗಡ್ದೆಗಳಿಗೆ ಕಾರಣವೆನಿಸಬಲ್ಲದೆಂದು ತಿಳಿದುಬಂದಿದೆ. ಅನ್ಯ ಅಧ್ಯಯನಗಳಿಂದ ತಿಳಿದುಬಂದಂತೆ ಪಿ ಎಫ್ ಓ ಎ ರಾಸಾಯನಿಕವು ಪುರುಷರಲ್ಲಿ ಸಂತಾನೋತ್ಪತ್ತಿಗೆ ಅವಶ್ಯವೆನಿಸುವ ಹಾರ್ಮೋನ್ ಗಳ ವ್ಯತ್ಯಯ ಮತ್ತು ಈಸ್ಟ್ರೋಜೆನ್ ಹಾರ್ಮೋನ್ ನ ಪ್ರಮಾಣ ಹೆಚ್ಚುವ ಹಾಗೂ ಟೆಸ್ಟೋಸ್ಟೆರಾನ್ ಹಾರ್ಮೋನ್ ನ ಅಸಾಮಾನ್ಯ ನಿಯಂತ್ರಣ ಮತ್ತು ಥೈರಾಯ್ಡ್ ಗ್ರಂಥಿಗಳಿಗೆ ಹಾನಿ ಸಂಭವಿಸಲು ಕಾರಣವೆನಿಸಬಲ್ಲದು. 

ಡು ಪಾಂಟ್ ಸಂಸ್ಥೆಯು ತನ್ನ ಉತ್ಪನ್ನದ ದುಷ್ಪರಿಣಾಮಗಳನ್ನು ಅಲ್ಲಗಳೆದಿದ್ದರೂ,ಟೆಫ್ಲಾನ್ ಲೇಪಿತ ಪಾತ್ರೆಗಳನ್ನು 660 ಡಿಗ್ರಿ ಫ್ಯಾರನ್ ಹೀಟ್ ನಷ್ಟು ಉಷ್ಣತೆಗೆ ಬಿಸಿಮಾಡಿದಲ್ಲಿ ಮಾತ್ರ ಇಂತಹ ಸಮಸ್ಯೆ ಉದ್ಭವಿಸಬಹುದು ಎಂದಿತ್ತು. ಇಷ್ಟೊಂದು ಉಷ್ಣತೆಗೆ ಪಾತ್ರೆಗಳು ಬಿಸಿಯಾಗಬೇಕಿದ್ದಲ್ಲಿ, ಪಾತ್ರೆಗಳಲ್ಲಿ ಯಾವುದೇ ಪದಾರ್ಥವನ್ನು ಹಾಕದೆ ಬೆಂಕಿಯ ಮೇಲಿರಿಸಿ ಮರೆತುಬಿಡುವುದೇ ಏಕಮಾತ್ರ ಕಾರಣವೆಂದು ಹೇಳಿತ್ತು. ಇದಲ್ಲದೆ ತನ್ನ ಉತ್ಪನ್ನಗಳು ಶಿಶುಗಳು,ಮಕ್ಕಳು,ಮಹಿಳೆಯರು,ವಯಸ್ಕರು ಮತ್ತು ವಯೋವೃದ್ಧರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರದು ಎಂದು ಘೋಷಿಸಿತ್ತು. ಆದರೆ ಡಿಸೆಂಬರ್ 2005 ರಲ್ಲಿ ಇದೇ ಸಂಸ್ಥೆಯು ಪಿ ಎಫ್ ಓ ಎ ರಾಸಾಯನಿಕದ ದುಷ್ಪರಿಣಾಮಗಳನ್ನು ಮುಚ್ಚಿಟ್ಟಿದಕ್ಕಾಗಿ 10.25 ಮಿಲಿಯನ್ ಡಾಲರ್ ದಂಡ ಮತ್ತು ಈ ಪಿ ಎಫ್ ಓ ಎ ರಾಸಾಯನಿಕದ  ಬಗ್ಗೆ ಸಂಶೋಧನೆ ಹಾಗೂ ಜನಸಾಮಾನ್ಯರಿಗೆ ತಿಳುವಳಿಕೆ ನೀಡುವ ಕಾರ್ಯಕ್ರಮದ ಸಲುವಾಗಿ 6.25 ಮಿಲಿಯನ್ ಡಾಲರ್ ಗಳನ್ನು ಪಾವತಿಸಿತ್ತು. 

ಪಿ ಎಫ್ ಓ ಎ ರಾಸಾಯನಿಕದಿಂದ ಉದ್ಭವಿಸಬಲ್ಲ ಗಂಭೀರ ಆರೋಗ್ಯದ ಸಮಸ್ಯೆಗಳನ್ನು ಗಮನಿಸಿದ ಡು ಪಾಂಟ್ ಸಂಸ್ಥೆಯು, 2015 ಕ್ಕೆ ಮುನ್ನ ಇದನ್ನು ತಮ್ಮ ಉತ್ಪನ್ನಗಳಲ್ಲಿ ಬಳಸುವುದನ್ನು ಸಂಪೂರ್ಣವಾಗಿ ನಿಲ್ಲಿಸಲು ನಿರ್ಧರಿಸಿದೆ.

ಅಂಟು ನಿರೋಧಕ ಪಾತ್ರೆಗಳ ಬಳಕೆಯಿಂದ ಉದ್ಭವಿಸಬಹುದಾದ ಆರೋಗ್ಯದ ಸಮಸ್ಯೆಗಳ ಬಗ್ಗೆ ಸಾಕಷ್ಟು ವಾದವಿವಾದಗಳು ಇದ್ದರೂ, ನಮ್ಮ ಆರೋಗ್ಯದ ರಕ್ಷಣೆಯ ದೃಷ್ಟಿಯಿಂದ ಇವುಗಳ ಬಳಕೆಯನ್ನು ನಿಲ್ಲಿಸುವುದು ಹಿತಕರ ಎನ್ನುವುದರಲ್ಲಿ ಎರಡುಮಾತಿಲ್ಲ. ಇದರೊಂದಿಗೆ ನಮ್ಮ ಪೂರ್ವಜರು ಬಳಸುತ್ತಿದ್ದ ಸಾಂಪ್ರದಾಯಿಕ ಪಾತ್ರೆ ಪಗಡಿಗಳನ್ನು ಬಳಸುವುದು ಆರೋಗ್ಯಕರವೂ ಹೌದು.  

ನಿಮಗಿದು ತಿಳಿದಿರಲಿ 

ಅಂಟು ನಿರೋಧಕ ಪಾತ್ರೆಗಳು, ಜಲ ನಿರೋಧಕ ವಸ್ತ್ರಗಳು ಮತ್ತು ಫಾಸ್ಟ್ ಫುಡ್ ಗಳ ಪ್ಯಾಕ್ ಗಳ ತಯಾರಿಕೆಯಲ್ಲಿ ಬಳಸುವ ರಾಸಾಯನಿಕ ದ್ರವ್ಯವು, ಪುಟ್ಟ ಮಕ್ಕಳಿಗೆ ನೀಡುವ ಲಸಿಕೆಗಳಿಂದ ಲಭಿಸಬೇಕಾದ ರೋಗನಿರೋಧಕ ಶಕ್ತಿಯನ್ನು ಕಡಿಮೆಮಾಡುತ್ತವೆ ಎಂದು ತಿಳಿದುಬಂದಿದೆ. ಜರ್ನಲ್ ಆಫ್ ದ ಅಮೆರಿಕನ್ ಮೆಡಿಕಲ್ ಅಸೋಸಿಯೇಶನ್ ನ ಸಂಚಿಕೆಯೊಂದರಲ್ಲಿ ಪ್ರಕಟವಾಗಿದ್ದ ಅಧ್ಯಯನದ ವರದಿಯಂತೆ, ಈ ರಾಸಾಯನಿಕವು ಟೆಟನಸ್ ಮತ್ತು ಡಿಪ್ತೀರಿಯಾ ವ್ಯಾಧಿಗಳನ್ನು ತಡೆಗಟ್ಟಬಲ್ಲ ಲಸಿಕೆಗಳ ಪರಿಣಾಮಗಳನ್ನು ಕುಂಠಿತಗೊಳಿಸುತ್ತದೆ. ಪರ್ ಫ್ಲೂರಿನೆಟೆದ್ ಕಂಪೌಂಡ್ ಗಳೇ ಈ ಸಮಸ್ಯೆಗೆ ಕಾರಣವೆನಿಸಿವೆ. ಈ ಪಿ ಎಫ್ ಸಿ ಕಾಂಪೌಂಡ್ ಗಳು ತಾಯಿಯ ಶರೀರದಿಂದ ಗರ್ಭಸ್ಥ ಶಿಶುವಿನ ಶರೀರಕ್ಕೆ ಹಾಗೂ ಮಗು ಜನಿಸಿದ ಬಳಿಕ ಸುತ್ತಮುತ್ತಲಿನ ಪರಿಸರದಿಂದಾಗಿಯೂ ಶಿಶುವಿನ ಶರೀರವನ್ನು ಸೇರುವ ಸಾಧ್ಯತೆಗಳಿವೆ.

ಡಾ . ಸಿ . ನಿತ್ಯಾನಂದ ಪೈ,ಪುತ್ತೂರು  

Karnatakada nivratta shaasakariginnu nishchinte!

                ಉದಯವಾಣಿ ಪತ್ರಿಕೆಯ ಅಂಕಣದಲ್ಲಿ ದಿ. 19-04-2012 ರಂದು ಪ್ರಕಟಿತ ಲೇಖನ 

         ಕರ್ನಾಟಕದ ನಿವೃತ್ತ ಶಾಸಕರಿಗಿನ್ನು ನಿಶ್ಚಿಂತೆ !

ಇಂದಿನ ದಿನಗಳಲ್ಲಿ ಸಾಕಷ್ಟು ಶ್ರಮಪಟ್ಟು ಉನ್ನತ ಶಿಕ್ಷಣವನ್ನು ಪಡೆದರೂ,ಕೈತುಂಬಾ ಸಂಬಳ ಸಿಗಬಲ್ಲ ಉತ್ತಮ ಉದ್ಯೋಗ ದೊರೆಯುವುದು ಸುಲಭವೇನಲ್ಲ. ಆದರೆ ಇದಕ್ಕೆ ವ್ಯತಿರಿಕ್ತವಾಗಿ ಯಾವುದೇ ಶೈಕ್ಷಣಿಕ ಅರ್ಹತೆ, ಅನುಭವ ಮತ್ತು ಬುದ್ದಿವಂತಿಕೆಗಳು ಇಲ್ಲದಿದ್ದರೂ, ಕೈತುಂಬಾ ಸಂಪಾದಿಸಬಲ್ಲ,ನಿವೃತ್ತಿಯ ಬಳಿಕವೂ ನಿಶ್ಚಿಂತೆಯಿಂದ ಜೇಬು ತುಂಬಿಸಬಲ್ಲ ಉತ್ತಮ ಉದ್ಯೋಗವೊಂದಿದೆ ಎಂದಲ್ಲಿ ನೀವೂ ನಂಬಲಾರಿರಿ. ಇಂತಹ ಉದ್ಯೋಗವು ದೇಶದ ಪ್ರತಿಯೊಂದು ರಾಜ್ಯಗಳಲ್ಲಿ ಲಭ್ಯವಿದೆ. ಇದನ್ನು ಗಳಿಸಿಕೊಳ್ಳಬಲ್ಲ ಸಾಮರ್ಥ್ಯ ಇದ್ದವರು ಕೇವಲ ಐದು ವರ್ಷಗಳ ಕಾಲ "ದುಡಿದಲ್ಲಿ" ಅಥವಾ ದುಡಿದಂತೆ ನಟಿಸಿದಲ್ಲಿ, ಮುಂದೆ ಜೀವನಪರ್ಯಂತ ಆರಾಮವಾಗಿ ಬದುಕಬಹುದಾಗಿದೆ. 

ಆದರೆ ಈ ಉದ್ಯೋಗ ದೊರೆಯಬೇಕಿದ್ದಲ್ಲಿ ಒಂದಿಷ್ಟು ರಾಜಕೀಯ ಪ್ರಭಾವ, ಸಾಕಷ್ಟು ಹಣಬಲ ಹಾಗೂ ಧಾರಾಳ ತೋಳ್ಬಲದ ಅವಶ್ಯಕತೆ ಇದೆ. ಸಮಾಜ ಸೇವೆ ಅಥವಾ ಜನಸೇವೆ ಎಂದು ರಾಜಕಾರಣಿಗಳು ನಾಮಕರಣ ಮಾಡಿರುವ ಈ ಉದ್ಯೋಗವನ್ನು ಪಡೆಯಬೇಕಿದ್ದಲ್ಲಿ,ನೀವು ಚುನಾವಣೆಯಲ್ಲಿ ಗೆಲ್ಲಲೇಬೇಕಾಗುತ್ತದೆ. ಕೇವಲ ಒಂದುಬಾರಿ ರಾಜ್ಯ ವಿಧಾನಸಭಾ ಚುನಾವಣೆಯಲ್ಲಿ ಗೆದ್ದು ಶಾಸಕರಾಗಿ ಐದು ವರ್ಷಗಳ ಅವಧಿಯನ್ನು ಪೂರೈಸಲು ಯಶಸ್ವಿಯಾದಲ್ಲಿ, ಮುಂದೆ ಜೀವನಪರ್ಯಂತ ನಿಶ್ಚಿಂತೆಯಿಂದ ನಿವೃತ್ತ ಜೀವನವನ್ನು ನಡೆಸಬಹುದಾಗಿದೆ!. 

ರಾಜ್ಯದ ವಿಧಾನಸಭಾ ಸದಸ್ಯರಾಗಿ ಕೇವಲ ಐದು ವರ್ಷಗಳ ಕಾಲ ಕಾರ್ಯನಿರ್ವಹಿಸಿದವರು  ನಿವೃತ್ತರಾದರೂ, ನಿಶ್ಚಿಂತೆಯಿಂದ ಜೀವಿಸಬಲ್ಲ ಅವಕಾಶವನ್ನು ಸ್ವಯಂ ಶಾಸಕರೇ ಕಲ್ಪಿಸಿಕೊಂಡಿದ್ದಾರೆ. ತಾವು ಮಾಡುತ್ತಿರುವುದು ಸಮಾಜಸೆವೆಯೇ ಹೊರತು ಉದ್ಯೋಗವಲ್ಲ ಎನ್ನುವ ನಮ್ಮ ಶಾಸಕರು, ತಮ್ಮ ಮಾಸಿಕವೇತನ, ವಿವಿಧ ಭತ್ಯೆಗಳು  ಮತ್ತು ಅನೇಕ ಅನ್ಯ ಸವಲತ್ತುಗಳನ್ನು ತಮಗೆ ಬೇಕೆನಿಸಿದಾಗ ಹಾಗೂ ತಮಗೆ ಬೇಕೆನಿಸಿದಷ್ಟು ಪ್ರಮಾಣದಲ್ಲಿ ತಾವೇ ಹೆಚ್ಚಿಸಿಕೊಳ್ಳುವ ಅಧಿಕಾರವನ್ನೂ ಹೊಂದಿದ್ದಾರೆ!. 

ಅಪರೂಪದಲ್ಲೊಮ್ಮೆ ನಡೆಯುವ ವಿಧಾನಸಭಾ ಕಲಾಪಗಳಲ್ಲಿ ಸದಾ ಸದ್ದುಗದ್ದಲ,ಧರಣಿ,ಪ್ರತಿಭಟನೆ ಮತ್ತು ಸಭಾತ್ಯಾಗ ಮಾಡುವ ವಿರೋಧಪಕ್ಷಗಳ ಶಾಸಕರು ಮತ್ತು ಮಾತುಮಾತಿಗೆ ಇವರನ್ನು ಜರೆಯುವ ಆಡಳಿತ ಪಕ್ಷದ ಸದಸ್ಯರ ನಡುವೆ, ಆಡಳಿತಕ್ಕೆ ಸಂಬಂಧಿಸಿದ ಯಾವುದೇ ವಿಚಾರದಲ್ಲೂ ಏಕಮತ ಮೂಡುವುದಿಲ್ಲ. ಆದರೆ ತಮ್ಮ ಸಂಬಳ ಸವಲತ್ತುಗಳನ್ನು ಹೆಚ್ಚಿಸುವ ಪ್ರಸ್ತಾವನೆಯನ್ನು ಸದನದಲ್ಲಿ ಮಂಡಿಸುವ ಸಂದರ್ಭದಲ್ಲಿ ಮಾತ್ರ ಇವರ ನಡುವೆ ಯಾವುದೇ ಭಿನ್ನಾಭಿಪ್ರಾಯ ಉದ್ಭವಿಸುವುದೇ ಇಲ್ಲ!. 

ಇತ್ತೀಚಿಗೆ ಒಂದು ಲಕ್ಷ ಕೋಟಿ ರೂಪಾಯಿಗಳ ಮುಂಗಡ ಆಯವ್ಯಯ ಪತ್ರವನ್ನು ರಾಜ್ಯದ ಮುಖ್ಯಮಂತ್ರಿಗಳು ವಿಧಾನಸಭೆಯಲ್ಲಿ ಮಂಡಿಸಿದ್ದಾರೆ. ಇದಕ್ಕೆ ಅನುಗುಣವಾಗಿ ರಾಜ್ಯ ಸರಕಾರದ ಸಾಲದ ಮೊತ್ತ, ಇದರ ಬಡ್ಡಿ ಮತ್ತು ಮರುಪಾವತಿಯ ಕಂತುಗಳ ಮೊತ್ತವೂ ಹೆಚ್ಚಲಿದೆ. ಇದರೊಂದಿಗೆ ರಾಜ್ಯ ಸರಕಾರದ ವಾರ್ಷಿಕ ಆದಾಯದ ಬಹು ದೊಡ್ದಪಾಲು, ಸರಕಾರೀ ನೌಕರರ ಸಂಬಳ,ಭತ್ಯೆ ಮತ್ತು ನಿವೃತ್ತ ನೌಕರರ ಪಿಂಚಣಿಗಾಗಿ ವ್ಯಯವಾಗುತ್ತಿದೆ. ಆದರೆ ರಾಜ್ಯದ ಆರ್ಥಿಕ ಸ್ಥಿತಿಗತಿ,ಜನಸಾಮಾನ್ಯರನ್ನು ಪೀಡಿಸುತ್ತಿರುವ ಬರ-ನೆರೆಗಳ ಬಗ್ಗೆ ಚಿಂತಿಸದ ಶಾಸಕರಿಗೆ,ಯಾವುದೇ ಸಂದರ್ಭದಲ್ಲೂ ತಮ್ಮ ಸಂಬಳ-ಸವಲತ್ತುಗಳನ್ನು ಹೆಚ್ಚಿಸಿಕೊಳ್ಳುವ ಸ್ವಾತಂತ್ರ್ಯವಿದೆ!. 

ವೇತನಕ್ಕಿಂತ ಅಧಿಕ ಪಿಂಚಣಿ !

"ಹುಟ್ಟಿದರೇ ಕನ್ನಡನಾಡಿನಲ್ಲಿ ಹುಟ್ಟಬೇಕು, ಮೆಟ್ಟಿದರೇ ಕನ್ನಡ ನೆಲವನ್ನು ಮೆಟ್ಟಬೇಕು ........... " ಎನ್ನುವ ಜನಪ್ರಿಯ ಸಿನೆಮಾ ಹಾಡಿನಂತೆ,ಕರ್ನಾಟಕದಲ್ಲಿ ಹುಟ್ಟಿ ಒಂದು ಬಾರಿ ಶಾಸಕರಾಗಿ ಆಯ್ಕೆಯಾದಲ್ಲಿ, ನಿಮ್ಮ ಅದೃಷ್ಟವೋ ಅದೃಷ್ಟ!. ಏಕೆಂದರೆ ಇತ್ತೀಚಿಗೆ ಜರಗಿದ್ದ ರಾಜ್ಯ ವಿಧಾನಸಭಾ ಬಜೆಟ್ ಅಧಿವೇಶನದಲ್ಲಿ, ರಾಜ್ಯದ ಮಾಜಿ ಶಾಸಕರಿಗೆ ನೀಡುತ್ತಿದ್ದ ಪಿಂಚಣಿ ಮತ್ತು ಇತರ ಸವಲತ್ತುಗಳನ್ನು ಸಾಕಷ್ಟು ಹೆಚ್ಚಿಸಲಾಗಿದೆ. ಈ ಬಂಪರ್ ಕೊಡುಗೆಯಿಂದಾಗಿ ಕೇವಲ ಐದುವರ್ಷಗಳ ಅವಧಿಯನ್ನು ಪೂರೈಸಿದ ಮಾಜಿ ಶಾಸಕರಿಗೆ ಮಾಸಿಕ 25,000 ರೂ. ಮತ್ತು ಒಂದಕ್ಕೂ ಹೆಚ್ಚು ಅವಧಿಗೆ ಶಾಸಕರಾಗಿದ್ದವರಿಗೆ ಗರಿಷ್ಟ 35,000 ರೂ. ಗಳ ಮಾಸಿಕ ಪಿಂಚಣಿ ದೊರೆಯಲಿದೆ. ಇದರೊಂದಿಗೆ ಆರೋಗ್ಯವಂತ ಶಾಸಕರಿಗೂ ಮಾಸಿಕ 2000 ರೂ. ಗಳ ವೈದ್ಯಕೀಯ ವೆಚ್ಚವನ್ನು ನೀಡಲು ಸರಕಾರ (ಅರ್ಥಾತ್ ಶಾಸಕರು) ಸಮ್ಮತಿಸಿದೆ. ಇಷ್ಟು ಮಾತ್ರವಲ್ಲ, ವರ್ಷಂಪ್ರತಿ ತಮಗೆ ಬೇಕೆನಿಸಿದಲ್ಲಿ ಪ್ರವಾಸ ಹೋಗಲು ಒಂದು ಲಕ್ಷ ರೂಪಾಯಿಗಳು,ದೂರವಾಣಿ ಮತ್ತು ಒಬ್ಬ ಸಿಬಂದಿಯ ಸೌಲಭ್ಯವೂ ದೊರೆಯಲಿದೆ. ಈ ರೀತಿಯ ಸೌಲಭ್ಯಗಳು ಜೀವನಪರ್ಯಂತ ದೊರೆಯಲಿರುವಾಗ, ಕೇವಲ ಒಂದು ಅಥವಾ ಅದಕ್ಕೂ ಹೆಚ್ಚಿನ ಅವಧಿಗೆ "ಜನಸೇವೆ"ಯನ್ನು ಮಾಡಿದ ಜನಪ್ರತಿನಿಧಿಗಳು, ನಿಶ್ಚಿಂತರಾಗಿ ನಿವೃತ್ತ ಜೀವನವನ್ನು ಕಳೆಯಲು ಯಾವುದೇ ಅಡ್ಡಿ ಆತಂಕಗಳು ಬಾಧಿಸುವ ಸಾಧ್ಯತೆಗಳೇ ಇರುವುದಿಲ್ಲ. ಇದೀಗ ನೀವೇ ಹೇಳಿ,ಜೀವನಪರ್ಯಂತ ದುಡಿದು ನಿವೃತ್ತರಾಗುವ ಜನಸಾಮಾನ್ಯರಿಗೂ ದೊರೆಯದ ಪಿಂಚಣಿ ಮತ್ತು ಇತರ ಸೌಲಭ್ಯಗಳು ದೊರೆಯುವಂತಹ ಅನ್ಯ ಉದ್ಯೋಗ ಬೇರೊಂದಿಲ್ಲ ಎನ್ನುವುದರಲ್ಲಿ ಸಂದೇಹವಿಲ್ಲ!. 

ಲಕ್ಷಾಧೀಶ್ವರ ಶಾಸಕರು 

2009 ನೆ ಇಸವಿಯ ಸೆಪ್ಟೆಂಬರ್ ತಿಂಗಳಿನಲ್ಲಿ ರಾಜ್ಯದ ವಿಧಾನಸಭೆ ಮತ್ತು ವಿಧಾನ ಪರಿಷತ್ತುಗಳಲ್ಲಿ ಯಾವುದೇ ಚರ್ಚೆ,ವಾದವಿವಾದಗಳು ಮತ್ತು ಸದನದ ಕಲಾಪವನ್ನು ಬಹಿಷ್ಕರಿಸುವ ಪ್ರಲಾಪಗಳಿಲ್ಲದೇ, ಸರ್ವಾನುಮತದಿಂದ ಈ ಮಸೂದೆಯನ್ನು ಅಂಗೀಕರಿಸಲಾಗಿತ್ತು. 

1956ರ ಕರ್ನಾಟಕ ವಿಧಾನಮಂಡಲದವರ ವೇತನಗಳು, ನಿವೃತ್ತಿವೇತನಗಳು ಮತ್ತು ಭತ್ಯೆಗಳ (ತಿದ್ದುಪಡಿ) ವಿಧೇಯಕ 2009 ನ್ನು ಆಡಳಿತ ಮತ್ತು ವಿರೋಧಪಕ್ಷಗಳ ಸದಸ್ಯರೆಲ್ಲರೂ ಸದ್ದುಗದ್ದಲವಿಲ್ಲದೆ ಅಂಗೀಕರಿಸಲಾಗಿತ್ತು. ಈ ಮಸೂದೆಯಿಂದಾಗಿ ರಾಜ್ಯದ ಬೊಕ್ಕಸಕ್ಕೆ 17.34 ಕೋಟಿ  ರೂ. ಗಳ ಹೆಚ್ಚುವರಿ ಹೊರೆ ಬೀಳಲಿದೆ. ಕಾಲಕ್ರಮೇಣ ನಿವೃತ್ತ ಶಾಸಕರ ಸಂಖ್ಯೆ ಹೆಚ್ಚುತ್ತಾ ಹೋದಂತೆಯೇ,ಈ ಹೊರೆಯ ಪ್ರಮಾಣವೂ ಸ್ವಾಭಾವಿಕವಾಗಿಯೇ ಹೆಚ್ಚಲಿದೆ!. 

2009 ರಲ್ಲಿ ಕರ್ನಾಟಕದ ಶಾಸಕರ ಮಾಸಿಕ ವೇತನವನ್ನು 8000 ರೂ. ಗಳಿಂದ 10,000 ರೂ. ಗಳಿಗೆ ಹೆಚ್ಚಿಸಲಾಗಿತ್ತು. ಈ ಸಂದರ್ಭದಲ್ಲಿ ನಿವೃತ್ತಿ ವೇತನವನ್ನು ಮಾಸಿಕ 5000 ರೂ. ಗಳಿಂದ ಕನಿಷ್ಠ 15,000 ರೂ.ಮತ್ತು ಗರಿಷ್ಟ 25,000 ರೂ. ಗಳಿಗೆ ಏರಿಸಲಾಗಿತ್ತು. ಇದಲ್ಲದೆ ಶಾಸಕರ ಕ್ಷೇತ್ರ ಭತ್ಯೆಯನ್ನು ಮಾಸಿಕ 3,500 ರೂ. ಗಳಿಂದ 15,000 ರೂ. ಮತ್ತು ದೂರವಾಣಿ ಭತ್ಯೆಯನ್ನು 7,500 ರಿಂದ 10,000 ರೂ. ಗಳಿಗೆ, ಅಂಚೆ ವೆಚ್ಚವನ್ನು 1000 ದಿಂದ 4000 ರೂ. ಗಳಿಗೆ ಮತ್ತು ಸಹಾಯಕ ಸಿಬಂದಿಯ ವೇತನವನ್ನು 2000 ದಿಂದ 4000 ರೂ. ಗಳಿಗೆ ಹೆಚ್ಚಿಸಲಾಗಿತ್ತು. ಇದಲ್ಲದೇ ಸದನದ ಕಲಾಪ ನಡೆಯುವಾಗ ದೊರೆಯುವ ದಿನಭತ್ಯೆ,ಸದನದ ವಿವಿಧ ಸಮಿತಿಗಳ ಸದಸ್ಯರಾಗಿದ್ದಲ್ಲಿ ಲಭಿಸುವ ಭತ್ಯೆ, ನಿಗಮ- ಮಂಡಳಿಗಳ ಅಧ್ಯಕ್ಷರಾಗಿದ್ದಲ್ಲಿ ಸಿಗುವ ಆರ್ಥಿಕ ಮತ್ತು ಅನ್ಯ ಸವಲತ್ತುಗಳು, ಬೆಂಗಳೂರಿನ ಪ್ರತಿಷ್ಟಿತ ಬಡಾವಣೆಯೊಂದರಲ್ಲಿ ಅತ್ಯಲ್ಪ ಬೆಲೆಗೆ ದೊರೆಯುವ ಜಿ ಕೆಟಗರಿ ನಿವೇಶನ(ಇತ್ತೀಚಿಗೆ ರಾಜ್ಯದ ಉಚ್ಚ ನ್ಯಾಯಾಲಯ ಈ ಸವಲತ್ತನ್ನು ರದ್ದುಗೊಳಿಸಿದೆ)  ಇತ್ಯಾದಿ ಸೌಲಭ್ಯಗಳ ಪಟ್ಟಿಯನ್ನು ಕಂಡಲ್ಲಿ, ಇವರನ್ನು ಚುನಾಯಿಸಿದ ಮತದಾರರಿಗೆ "ಶಾಕ್ " ಹೊಡೆಯುವುದರಲ್ಲಿ ಸಂದೇಹವಿಲ್ಲ. 

2009 ರ ಸೆಪ್ಟೆಂಬರ್ ತಿಂಗಳಿನಲ್ಲಿ ಶಾಸಕರಿಗೆ ವೇತನಕ್ಕಿಂತಲೂ ಹಲವಾರು ಪಟ್ಟು ಅಧಿಕ ಮೊತ್ತದ ಪಿಂಚಣಿಯನ್ನು ನೀಡಲು ನಿರ್ಧರಿಸಿದ್ದ ಸರಕಾರವು, ಇದೀಗ ಮತ್ತೊಮ್ಮೆ ಹೆಚ್ಚಿಸಲು ನಿರ್ಧರಿಸಿರುವುದು ನಂಬಲು ಅಸಾಧ್ಯವೆನಿಸುತ್ತಿದೆ. ಆದರೆ ಪ್ರಸ್ತುತ ಕರ್ನಾಟಕದಲ್ಲಿ ನಡೆಯುತ್ತಿರುವ ರಾಜಕೀಯ ದೊಂಬರಾಟವನ್ನು ಗಮನಿಸಿದಾಗ, ಹಾಲಿ ಶಾಸಕರಿಗೆ ಮುಂದಿನ ಚುನಾವಣೆಯಲ್ಲಿ ಮತ್ತೆ ಗೆದ್ದು ಬರುವ ವಿಶ್ವಾಸ ಇಲ್ಲದಿರುವುದು ಸ್ಪಷ್ಟವಾಗಿ ಗೋಚರಿಸುತ್ತದೆ!.

ಅಪವಾದವಿಹುದೇ? 

ಆದರೆ ಭಾರತದ ಸಿ.ಪಿ. ಎಂ ಪಕ್ಷದ ಶಾಸಕರು- ಸಂಸದರು ಮಾತ್ರ ಇದಕ್ಕೆ ಅಪವಾದವೆನಿಸುತ್ತಾರೆ. ಏಕೆಂದರೆ ಈ ಪಕ್ಷದ ಸಂಸದರು ತಮಗೆ ದೊರೆಯುವ ಮಾಸಿಕ ವೇತನ ಮತ್ತು ಭತ್ಯೆಯಾಗಿರುವ 1.10 ಲಕ್ಷ ರೂ. ಗಳಲ್ಲಿ ಶೇ. 70 ರಷ್ಟು ಅಂದರೆ ಸುಮಾರು 75,000 ರೂ. ಗಳನ್ನು, ತಮ್ಮ ಪಕ್ಷಕ್ಕೆ ನೀಡುವ ವಿಶಿಷ್ಠ ಸಂಪ್ರದಾಯ ಇಂದಿಗೂ ಜಾರಿಯಲ್ಲಿದೆ. ಮಿಕ್ಕಿ ಉಳಿದ 35,000 ರೂ. ಗಳನ್ನು ಮಾತ್ರ ಸಂಸದರು ತಮ್ಮ ಖರ್ಚುವೆಚ್ಚಗಳಿಗಾಗಿ ಬಳಸುತ್ತಾರೆ. ಅದೇ  ರೀತಿಯಲ್ಲಿ ಇದೇ ಪಕ್ಷದ ರಾಜ್ಯಸಭಾ ಸದಸ್ಯರು ತಮಗೆ ದೊರೆಯುವ ಮಾಸಿಕ ವೇತನ-ಭತ್ಯೆಯಲ್ಲಿ ಪ್ರತೀ ತಿಂಗಳಿನಲ್ಲೂ, 80,000 ರೂ. ಗಳನ್ನು ಪಕ್ಷಕ್ಕೆ ನೀಡುತ್ತಾರೆ!. 

2010 ಕ್ಕೂ ಮುನ್ನ ಸಂಸದರ ವೇತನವು 42,000 ರೂ. ಗಳಿದ್ದಾಗ, ಸಿ. ಪಿ. ಎಂ ಪಕ್ಷದ ಸಂಸದರು 35,000 ರೂ. ಗಳನ್ನು ಪಕ್ಷಕ್ಕೆ ನೀಡುತ್ತಿದ್ದರು. ಆ ಪಕ್ಷದ ಹಿರಿಯ ನಾಯಕರು ಹೇಳುವಂತೆ, ಅನ್ಯಪಕ್ಷಗಳ ಸದಸ್ಯರು ಚುನಾವಣೆಗಳ ಸಂದರ್ಭದಲ್ಲಿ ತಾವೇ ಹಣವನ್ನು ಖರ್ಚು ಮಾಡುತ್ತಾರಾದರೆ, ಸಿ. ಪಿ. ಎಂ ಪಕ್ಷವು ಅಭ್ಯರ್ಥಿಗಳ ಚುನಾವಣಾ ವೆಚ್ಚವನ್ನು ತಾನೇ ಭರಿಸುತ್ತದೆ. ಜೊತೆಗೆ ಪಕ್ಷದ ಸಂಸದರು ಮತ್ತು ಶಾಸಕರು ಜನಸಾಮಾನ್ಯರಂತೆ ಜೀವಿಸಲು ಅವರಿಗೆ ದೊರೆಯುವ ವೇತನದ ಶೇ. 30 ರಷ್ಟು ಮೊತ್ತವು ಸಾಕಾಗುವುದು. ಇಷ್ಟು ಮಾತ್ರವಲ್ಲ,ಈ ಪಕ್ಷದ ನಿವೃತ್ತ ಶಾಸಕ-ಸಂಸದರು ತಮಗೆ ದೊರೆಯುವ ನಿವೃತ್ತಿ ವೆತನವಾಗಿರುವ 25,000 ರೂ. ಗಳಲ್ಲಿ 15,000 ರೂ.ಗಳನ್ನು ಪಕ್ಷದ ನಿಧಿಗೆ ನೀಡಬೇಕಾಗಿದೆ!. 

ನಿಜಹೆಳಬೇಕಿದ್ದಲ್ಲಿ ಸಂಸದರ ವೇತನ ಮತ್ತು ಭತ್ಯೆಗಳನ್ನು 2010 ರಲ್ಲಿ ಶೇ. 300 ರಷ್ಟು ಹೆಚ್ಚಿಸುವ ನಿರ್ಣಯವನ್ನು ಕೇವಲ ಸಿ. ಪಿ. ಎಂ ಪಕ್ಷವು ತೀವ್ರವಾಗಿ ವಿರೋಧಿಸಿತ್ತು. ಅಂತೆಯೇ ವೇತನ ಹೆಚ್ಚಳ ಜಾರಿಗೆ ಬಂದ ಬಳಿಕ, ಸಂಸದರು ಪಕ್ಷಕ್ಕೆ ನೀಡುವ ದೇಣಿಗೆಯ ಪ್ರಮಾಣವನ್ನೂ ಹೆಚ್ಚಿಸಿತ್ತು!. 

ಆದರೆ ನಮ್ಮ ಸುವರ್ಣ ಕರ್ನಾಟಕದಲ್ಲಿ ನಡೆಯುವ ವಿಚಿತ್ರ ವಿದ್ಯಮಾನಗಳನ್ನು ಗಮನಿಸಿದಾಗ , ರಾಜ್ಯದ ಮತದಾರರಿಗೂ ಲಜ್ಜೆಯೆನಿಸುತ್ತದೆ. ಗತವರ್ಷದಲ್ಲಿ ಬೆಳಗಾವಿಯಲ್ಲಿ ನಡೆದಿದ್ದ ಅಧಿವೇಶನದಲ್ಲಿ, ಕಾನೂನು ಸಚಿವರಾಗಿದ್ದ ಸುರೇಶ ಕುಮಾರ್ ಮಂಡಿಸಿದ್ದ "ಅನರ್ಹ ಶಾಸಕರಿಗೂ ಪಿಂಚಣಿ ಮತ್ತಿತರ ಸೌಲಭ್ಯಗಳನ್ನು ನೀಡುವ ನಿರ್ಣಯ"ವನ್ನು ಸರ್ವಾನುಮತದಿಂದ ಅಂಗೀಕರಿಸಿದ್ದುದು ,ಲಜ್ಜೆಗೇಡಿತನದ ಪರಮಾವಧಿ ಎನ್ನುವುದರಲ್ಲಿ ಸಂದೇಹವಿಲ್ಲ!.  

ಡಾ. ಸಿ . ನಿತ್ಯಾನಂದ ಪೈ, ಪುತ್ತೂರು 

Saamaanya sheeta.........

                        ಸಾಮಾನ್ಯ ಶೀತ -  ತೊಂದರೆಗಳು ವಿಪರೀತ !

ಪ್ರಪಂಚದ ಪ್ರತಿಯೊಂದು ರಾಷ್ಟ್ರಗಳ ಪ್ರಜೆಗಳನ್ನು ತಪ್ಪದೆ ಪೀಡಿಸುವ, ತನ್ನ ಸಾಂಕ್ರಾಮಿಕತೆಯಿಂದಾಗಿ ಕ್ಷಿಪ್ರಗತಿಯಲ್ಲಿ ವ್ಯಾಪಕವಾಗಿ ಹರಡಬಲ್ಲ ಹಾಗೂ ಬಹುತೇಕ ಭಾರತೀಯರಲ್ಲಿ ಅನೇಕ ತಪ್ಪುಕಲ್ಪನೆಗಳಿಗೆ ಕಾರಣವೆನಿಸಿರುವ ಕಾಯಿಲೆಗಳಲ್ಲಿ "ಸಾಮಾನ್ಯ ಶೀತ " ಪ್ರಮುಖವಾಗಿದೆ. ಈ ಬಗ್ಗೆ ನೀವು ತಿಳಿದಿರಲೇಬೇಕಾದ ಒಂದಿಷ್ಟು ಮಾಹಿತಿಗಳು ಇಲ್ಲಿವೆ. 

ಮುಂಗಾರು ಮಳೆ ಬಂದೆರಗಿದಂತೆಯೇ ಆರಂಭವಾಗುವ ಪಾಥಶಾಲೆಗಳಿಗೆ ತೆರಳುವ ತಮ್ಮ ಮಕ್ಕಳನ್ನು ತಪ್ಪದೆ ಬಾಧಿಸುವ ಶೀತ-ಜ್ವರಗಳ ಬಗ್ಗೆ ಮಾತಾಪಿತರು ಚಿಂತಿತರಾಗುವುದು ಸ್ವಾಭಾವಿಕ. ಧಾರಾಕಾರವಾಗಿ ಸುರಿಯುವ ಮಳೆಯಿಂದ ಮಕ್ಕಳನ್ನು ರಕ್ಷಿಸಲು ಕೊಡೆ, ರೈನ್ ಕೋಟ್, ಟೋಪಿ ಮತ್ತು "ಥಂಡಿ " ಯಿಂದ ಕಾಪಾಡಲು ಸ್ವೆಟರ್ ಗಳನ್ನೂ ತೊಡಿಸುವ ಮಾತಾಪಿತರು, ಇಷ್ಟೆಲ್ಲಾ ಮುಂಜಾಗರೂಕತೆ ವಹಿಸಿದರೂ ತಮ್ಮ ಮಕ್ಕಳನ್ನು ಶೀತದ ಬಾಧೆಯಿಂದ ರಕ್ಷಿಸಲು ವಿಫಲರಾಗುತ್ತಾರೆ!. ಅದರಲ್ಲೂ "ತೀರ್ಥ ಕುಡಿದರೆ ಶೀತ, ಆರತಿ ಪಡೆದರೆ ಉಷ್ಣ" ವಾಗುವ ಸೂಕ್ಷ್ಮ ಪ್ರಕೃತಿಯ ಮಕ್ಕಳಂತೂ,ಅಡಿಗಡಿಗೆ ಬಾಧಿಸುವ ನೆಗಡಿಯ ತೊಂದರೆಗಳಿಂದ ಹೈರಾಣಾಗುತ್ತಾರೆ. 

ತಪ್ಪು ಕಲ್ಪನೆಗಳು 

ವಿದ್ಯಾವಂತ- ಅವಿದ್ಯಾವಂತರೆನ್ನುವ ಭೇದವಿಲ್ಲದೇ ಅನೇಕ ಭಾರತೀಯರು ಸಾಮಾನ್ಯ ಶೀತದ ಬಗ್ಗೆ ಸಾಕಷ್ಟು ತಪ್ಪು ಕಲ್ಪನೆಗಳನ್ನು ಹೊಂದಿದ್ದಾರೆ. ಹಿಂದಿನ ತಲೆಮಾರಿನವರು ಹೇಳುತ್ತಿದ್ದಂತೆ ಥಂಡಿಯ ಬಾಧೆ, ಮಳೆಯಲ್ಲಿ ನೆನೆಯುವುದು, ಚಳಿಗಾಲದಲ್ಲಿ ಇಬ್ಬನಿ ತಲೆಗೆ ಬೀಳುವುದು,ತಣ್ಣನೆಯ ಗಾಳಿ, ಐಸ್ ಕ್ರೀಮ್ - ತಣ್ಣಗಿನ ರಸಗಳ ಸೇವನೆ ಇತ್ಯಾದಿಗಳು ಶೀತ ಬಾಧಿಸಲು ಕಾರಣವೆನಿಸುವುದಿಲ್ಲ. ಇದು ನಿಜವಾಗಿದ್ದಲ್ಲಿ ಕಡುಬೇಸಗೆಯ ದಿನಗಳಲ್ಲಿ ಯಾರಿಗೂ ಶೀತ ಬಾಧಿಸುವ ಸಾಧ್ಯತೆಗಳೇ ಇರಲಿಲ್ಲ!. 

ಏನಿದು ಸಾಮಾನ್ಯ ಶೀತ?

"ಔಷದ ಸೇವಿಸಿದರೆ ಒಂದು ವಾರದಲ್ಲಿ ಹಾಗೂ ಔಷದ ಸೇವಿಸದೇ ಇದ್ದಲ್ಲಿ ಏಳು ದಿನಗಳಲ್ಲಿ ಗುಣವಾಗುವುದು " ಎನ್ನುವ ಆಡುಮಾತಿನಿಂದ ಪ್ರಖ್ಯಾತವಾಗಿರುವ ಶೀತ ಅಥವಾ ನೆಗಡಿ ಎನ್ನುವ ವ್ಯಾಧಿಯ ಬಾಧೆಯನ್ನು ಅನುಭವಿಸದವರು ಈ ಜಗತ್ತಿನಲ್ಲೇ ಇಲ್ಲವೆಂದಲ್ಲಿ ಅತಿಶಯೋಕ್ತಿ ಎನಿಸಲಾರದು. ವೈದ್ಯಕೀಯ ಪರಿಭಾಷೆಯಲ್ಲಿ Coryza ಅಥವಾ Common cold ಎಂದು ಕರೆಯಲ್ಪಡುವ ಈ ಪೀಡೆಗೆ, ಸುಮಾರು 250 ಕ್ಕೂ ಹೆಚ್ಚು ವಿಧದ ರಿನೊ ವೈರಸ್ಗಳು ಕಾರಣವಾಗಿವೆ. 

ನಿಮ್ಮನ್ನು ಒಂದುಬಾರಿ ಬಾಧಿಸಿದ ಒಂದು ನಿರ್ದಿಷ್ಟ ರಿನೊ ವೈರಸ್ ನ ವಿರುದ್ಧ ನಿಮ್ಮ ಶರೀರವು ಪ್ರತಿರೋಧಕ ಶಕ್ತಿಯನ್ನು ಗಳಿಸಿಕೊಳ್ಳುತ್ತದೆ. ಇದರಿಂದಾಗಿ ಇದೇ ವೈರಸ್ ನಿಮ್ಮನ್ನು ಮತ್ತೊಮ್ಮೆ ಬಾಧಿಸದು. ಆದರೆ 250 ಕ್ಕೂ ಹೆಚ್ಚು ವಿಧದ ಇಂತಹ ವೈರಸ್ ಗಳಿಂದಾಗಿ, ನಿಮ್ಮನ್ನು ಬಾಧಿಸಿದ ಒಂದು ವೈರಸ್ ನ ಹಾವಳಿ ಕಡಿಮೆಯಾದೊಡನೆ, ಮತ್ತೊಂದು ವಿಧದ ರಿನೊ ವೈರಸ್ ನಿಂದಾಗಿ ಮತ್ತೊಮ್ಮೆ ಶೀತ ಪ್ರತ್ಯಕ್ಷವಾಗುವುದು ಅಪರೂಪವೇನಲ್ಲ!. 

ಸಾಮಾನ್ಯವಾಗಿ ಒಂದು ವಿಧದ ರಿನೊ ವೈರಸ್ ನ ಸೋಂಕಿನಿಂದ "ವೈರಲ್ ರಿನೈಟಿಸ್ ' ಅರ್ಥಾತ್ ಶೀತ ಆರಂಭವಾಗುವುದು. ಈ ವೈರಸ್ ಗಳು ರೋಗಪೀಡಿತ ವ್ಯಕ್ತಿಗಳ ಸಂಪರ್ಕದಿಂದ,ರೋಗಪೀಡಿತರಾಗದಿದ್ದರೂ ತಮ್ಮ ಶರೀರದಲ್ಲಿ ಈ ವೈರಸ್ ಗಳನ್ನೂ ಸಲಹುವ "ವಾಹಕ " ರಿಂದ (ಉದಾ- ಆಸ್ಪತ್ರೆಯಲ್ಲಿನ ವೈದ್ಯರು ಅಥವಾ ದಾದಿಯರು ), ರೋಗಿ ಶೀನಿದಾಗ-ಕೆಮ್ಮಿದಾಗ ಹೊರಬೀಳುವ ತುಂತುರುಗಳ ಮೂಲಕ, ರೋಗಿ ಮುಟ್ಟಿರುವ -ಬಳಸಿರುವ ವಸ್ತುಗಳನ್ನು ಮತ್ತೊಬ್ಬರು ಬಳಸುವುದರಿಂದ ಸುಲಭವಾಗಿ ಹಾಗೂ ಸಾಂಕ್ರಾಮಿಕವಾಗಿ ಹರಡುತ್ತವೆ. 

ಆದರೆ ಜನಸಾಮಾನ್ಯರು ನಂಬಿರುವಂತೆ ಥಂಡಿಯ ಬಾಧೆ,ಹವಾಮಾನದ ವೈಪರೀತ್ಯ,ಶೀತಕಾರಕ ಆಹಾರ ಪದಾರ್ಥಗಳ ಸೇವನೆಗಳು "ಶೀತ " ಕ್ಕೆ ಕಾರಣವೆನಿಸುವುದಿಲ್ಲ. ಕಡುಬೇಸಗೆಯಲ್ಲಿ ಹಠಾತ್ತಾಗಿ ಸುರಿಯುವ ಅಕಾಲಿಕ ಮಳೆಯಿಂದಾಗಿ ವಾತಾವರಣದ ಉಷ್ಣತೆಯು ಕ್ಷಣಮಾತ್ರದಲ್ಲಿ ಬದಲಾಗುವಂತಹ ಸ್ಥಿತಿಯು, ಶೀತದ ವೈರಸ್ ಗಳ ಬೆಳವಣಿಗೆಗೆ ಅನುಕೂಲಕರವಾಗಿ ಪರಿಣಮಿಸಬಹುದು. ಇಂತಹ ಸಂದರ್ಭಗಳಲ್ಲಿ ಈ ವೈರಸ್ ನ ಸೋಂಕು ಒಬ್ಬರಿಂದ ಮತ್ತೊಬ್ಬರಿಗೆ ಹರಡುವ ಮತ್ತು ಇವುಗಳ ಹಾವಳಿ ಇನ್ನಷ್ಟು ಹೆಚ್ಚಾಗುವ ಸಾಧ್ಯತೆಗಳಿವೆ. 

ಶೀತದ ಲಕ್ಷಣಗಳು 

ರಿನೊ ವೈರಸ್ ಗಳು ನಿಮ್ಮ ಮೂಗಿನ ಮೂಲಕ ಶರೀರದಲ್ಲಿ ಪ್ರವೇಶಿಸಿದ 24 ರಿಂದ 48 ಗಂಟೆಗಳಲ್ಲಿ ಶೀತದ ಲಕ್ಷಣಗಳು ಪ್ರಕಟಗೊಳ್ಳುತ್ತವೆ. ಸದ್ದು ಮಾಡದೇ ಬಂದೆರಗುವ ಈ ವೈರಸ್ ಗಳಿಂದಾಗಿ ಮೂಗಿನಲ್ಲಿ ಕಚಗುಳಿಯಂತಹ ಸಂವೇದನೆಯೊಂದಿಗೆ ಶೀನು ಆರಂಭವಾಗುವುದು. ತದನಂತರ ಮೂಗಿನಿಂದ ನೀರಿಳಿಯುವುದು, ಕಣ್ಣುಗಳಲ್ಲಿ ಉರಿ, ಗಂಟಲು ಶುಷ್ಕವಾದಂತಾಗಿ ಕೆರೆತ,ಕೆಮ್ಮು, ತಲೆನೋವು-ತಲೆಭಾರ ಇತ್ಯಾದಿ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ನಾಲ್ಕಾರು ದಿನಗಳ ಕಾಲ ಬಾಧಿಸುವ ಶೀತದೊಂದಿಗೆ ದ್ವಿತೀಯ ಹಂತದ ಸೋಂಕು ತಲೆದೋರಿದಲ್ಲಿ, ಮೂಗಿನಿಂದ ದಪ್ಪವಾದ ಹಳದಿ ಅಥವಾ ಹಸಿರುಮಿಶ್ರಿತ ಹಳದಿ ಬಣ್ಣದ ಸಿಂಬಳ ಒಸರುವುದು ಅಪರೂಪವೇನಲ್ಲ. ಈ ಶ್ಲೇಷ್ಮದಿಂದಾಗಿ ಮೂಗಿನಿಂದ ಉಸಿರಾಡಲು ಅದಚನೆಯಾಗುವುದು. ಇದಲ್ಲದೆ ಶರೀರದ ಮಾಂಸಪೇಶಿಗಳಲ್ಲಿ ನೋವು,ಅತಿ ಆಯಾಸ ಹಾಗೂ ಅಲ್ಪ ಪ್ರಮಾಣದ ಜ್ವರವೂ ಬಾಧಿಸಬಹುದು. ಮತ್ತೆ ಕೆಲವರಲ್ಲಿ ಉಲ್ಬಣಿಸಿದ ಶೀತದಿಂದಾಗಿ ತೀವ್ರಜ್ವರ,ಮಾತನಾಡುವಾಗ ಧ್ವನಿ ಬದಲಾಗುವುದು ಅಥವಾ ಸ್ವರವೇ ಇಲ್ಲದಂತಾಗುವುದು,ತೀವ್ರ ಕೆಮ್ಮು ಮತ್ತು ವಿಪರೀತ ತಲೆನೋವಿನಂತಹ ಸಮಸ್ಯೆಗಳು ಪ್ರತ್ಯಕ್ಷವಾಗಳು ದ್ವಿತೀಯ ಹಂತದ ಬ್ಯಾಕ್ಟೀರಿಯಾಗಳ ಸೋಂಕು ಕಾರಣವೆನಿಸುತ್ತದೆ. 

ಆದರೆ ಪದೇಪದೇ ಬಾಧಿಸುವ, ಕ್ಷಣಮಾತ್ರದಲ್ಲಿ ಆರಂಭವಾಗಿ ಕೇವಲ ಶೀನು ಮತ್ತು ಮೂಗಿನಿಂದ ನೀರಿಳಿಯುವುದಕ್ಕೆ ಸೀಮಿತವಾಗಿರುವ ಹಾಗೂ ಮೇಲೆ ವಿವರಿಸಿದ ಶೀತದ ಅನ್ಯ ಲಕ್ಷಣಗಳನ್ನೇ ತೋರದ, ಸೂಕ್ತ ಔಷದವನ್ನು ಸೇವಿಸಿದೊಡನೆ ಮಾಯವಾಗುವ ಶೀತವು "ಅಲರ್ಜಿ ' ಯಿಂದ ಉದ್ಭವಿಸುವುದು. ಅಲರ್ಜಿಕ್ ರಿನೈಟಿಸ್ ಎಂದು ಕರೆಯಲ್ಪಡುವ ಈ ಸಮಸ್ಯೆಗೆ ಶೀತಕ್ಕೆ ಕಾರಣವೆನಿಸಬಲ್ಲ ರಿನೊ ವೈರಸ್ ಗಳು ಕಾರಣವಲ್ಲ. 

ಅಸಾಮಾನ್ಯ ತೊಂದರೆಗಳು 

ಶೀತ ಪೀಡಿತ ವ್ಯಕ್ತಿಗಳಿಗೆ "ಸೈನಸೈಟಿಸ್ " ಆರಂಭವಾದಲ್ಲಿ ಇನ್ನಷ್ಟು ತೊಂದರೆಗಳು ತಲೆದೋರುತ್ತವೆ. ಇದರಿಂದಾಗಿ ವಿಪರೀತ ಹಾಗೂ ಸಹಿಸಲಾಗದ ತಲೆನೋವು ಪೀಡಿಸುತ್ತದೆ. ಇದಲ್ಲದೇ ಮುಖದ ಭಾಗದಲ್ಲಿ ಕಣ್ಣಿನ ಹುಬ್ಬುಗಳು ಮತ್ತು ಮೂಗಿನ ಹೊಳ್ಳೆಗಳ ಇಕ್ಕೆಲಗಳಲ್ಲಿನ ಸೈನಸ್  ಗಳಿಗೆ ಸೋಂಕು ತಗಲಿದ ಪರಿಣಾಮವಾಗಿ ಇಲ್ಲಿ ಒತ್ತಿದಾಗ ಅಥವಾ ತಲೆಯನ್ನು ಬಗ್ಗಿಸಿ ಕೆಲಸ ಮಾಡುವಾಗ ತಲೆನೋವು ಅಸಹನೀಯವೆನಿಸುತ್ತದೆ. ರೋಗಿಗಳ ನಿರ್ಲಕ್ಷ್ಯದಿಂದಾಗಿ ಅಥವಾ ಇತರ ಕಾರಣಗಳಿಂದಾಗಿ ಈ ಸಮಸ್ಯೆ ಸುದೀರ್ಘಕಾಲ ಉಳಿದುಕೊಂಡಲ್ಲಿ , ಮೂಗಿನಿಂದ ನಿರಂತರವಾಗಿ ನೀರಿಳಿಯುವುದು , ಶ್ವಾಸೋಚ್ವಾಸದ ಅಡಚಣೆ ಮತ್ತು ತೀವ್ರ ತಲೆನೋವಿನಂತಹ ಸಮಸ್ಯೆಗಳು ಸತತವಾಗಿ ಬಾಧಿಸುವುದು ಅಪರೂಪವೇನಲ್ಲ. 

ಇದಲ್ಲದೆ ಶ್ರವಣ ಇಂದ್ರಿಯದ ನರಗಳ ಉರಿಯೂತದಿಂದ ಕಿವುಡುತನ,ನಡುಕಿವಿಯ ಸೋಂಕು,ಕಿವಿ ಸೋರುವುದು,ಕಿವಿನೋವು ಮತ್ತು ಜ್ವರಗಳು ಸಾಮಾನ್ಯವಾಗಿ ಶೀತಪೀಡಿತ ಮಕ್ಕಳಲ್ಲಿ ಕಂದುಬರುವುದುಂಟು. ದ್ವಿತೀಯ ಹಂತದ ಸೋಂಕಿನಿಂದ ಸಂಭವಿಸಬಲ್ಲ ಇಂತಹ ತೊಂದರೆಗಳೊಂದಿಗೆ ಗಂಟಲು,ಧ್ವನಿಪೆಟ್ಟಿಗೆ,ಶ್ವಾಸನಾಳಗಳು ಮತ್ತು ಶ್ವಾಸಕೋಶಗಳ ಸೋಂಕು- ಉರಿಯೂತಗಳೂ ಅನೇಕರನ್ನು ಕಾಡುತ್ತವೆ. ದೀರ್ಘಕಾಲೀನ ಶ್ವಾಸಕೋಶಗಳ ಅದಚನೆಯಂತಹ ವ್ಯಾಧಿ ಪೀಡಿತರು,ಆಸ್ತಮಾ ರೋಗಿಗಳು ಮತ್ತು ಶ್ವಾಸಕೋಶ ಸಂಬಂಧಿತ ಅನ್ಯ ಕಾಯಿಲೆಗಳು ಇರುವ ರೋಗಿಗಳಿಗೆ ಸಾಮಾನ್ಯ ಶೀತ ಬಾಧಿಸಿದಲ್ಲಿ, ಇವರ ಆರೋಗ್ಯದ ಸಮಸ್ಯೆಗಳು ಇನ್ನಷ್ಟು ಉಲ್ಬಣಿಸುವ ಸಾಧ್ಯತೆಗಳಿವೆ. 

ಚಿಕಿತ್ಸೆ 

ಸಾಮಾನ್ಯ ಶೀತವನ್ನು ಖಚಿತವಾಗಿ ಗುಣಪಡಿಸಬಲ್ಲ ಔಷದಗಳನ್ನು ಇದುವರೆಗೆ ಪತ್ತೆಹಚ್ಚಿಲ್ಲ. ಇದೇ ಕಾರಣದಿಂದಾಗಿ ರೋಗಿಗಳಲ್ಲಿ ಕಂಡುಬರುವ ಲಕ್ಷಣಗಳಿಗೆ ಹಾಗೂ ಇದರೊಂದಿಗೆ ಉದ್ಭವಿಸಿದ ಇತರ ಸಮಸ್ಯೆಗಳಿಗೆ ಅನುಗುಣವಾಗಿ, ಅವಶ್ಯಕ ಔಷದಗಳನ್ನು ವೈದ್ಯರು ನೀಡಬೇಕಾಗುತ್ತದೆ. 

ಶೀತ ಆರಂಭವಾದ ಮೊದಲ ಎರಡು -ನಾಲ್ಕು ದಿನಗಳ ಕಾಲ ಇದು ತೀವ್ರವಾಗಿ ಹರಡುವುದರಿಂದ ,ಈ ಅವಧಿಯಲ್ಲಿ ಶೀತ ಪೀಡಿತರು ಏಕಾಂತವಾಸ ಮಾಡಿದಲ್ಲಿ ಇದರ ಹರಡುವಿಕೆಯನ್ನು ತಕ್ಕಮಟ್ಟಿಗೆ ನಿಯಂತ್ರಿಸಬಹುದಾಗಿದೆ. 

ನಿಮಗಿದು ತಿಳಿದಿರಲಿ 

ವಿಶ್ವಾದ್ಯಂತ ವ್ಯಾಪಕವಾಗಿ ಹರಡಬಲ್ಲ ಕಾಯಿಲೆಗಳಲ್ಲಿ ಸಾಮಾನ್ಯ ಶೀತಕ್ಕೆ ಅಗ್ರ ಸ್ಥಾನ ಸಲ್ಲುತ್ತದೆ. ಜೊತೆಗೆ 250 ಕ್ಕೂ ಹೆಚ್ಚು ವಿಧದ ವೈರಸ್ ಗಳು ಇದಕ್ಕೆ ಕಾರಣವೆನಿಸಿರುವುದರಿಂದ , ನಮ್ಮೆಲ್ಲರಿಗೂ ವರ್ಷದಲ್ಲಿ ಕನಿಷ್ಠ ಒಂದರಿಂದ ಆರು ಬಾರಿ ಶೀತ ಬಾಧಿಸುವ ಸಾಧ್ಯತೆಗಳಿವೆ. ನಿಮ್ಮನ್ನು ಒಮ್ಮೆ ಬಾಧಿಸಿದ ರಿನೊ ವೈರಸ್ ನ ವಿರುದ್ಧ ನಿಮ್ಮ ಶರೀರವು ಪ್ರತಿರೋಧಕ ಶಕ್ತಿಯನ್ನು ಗಳಿಸುವುದರಿಂದ,ಅದೇ ವೈರಸ್ ಮತ್ತೊಮ್ಮೆ ನಿಮ್ಮನ್ನು ಬಾಧಿಸದು. ಆದರೆ ಮನುಷ್ಯನ ಜೀವಿತಾವಧಿಯಲ್ಲಿ 250 ಕ್ಕೂ ಅಧಿಕ ವಿಧದ ರಿನೊ ವೈರಸ್ ಸೋಂಕುಗಳು ಒಬ್ಬ ವ್ಯಕ್ತಿಗೆ ತಗಲುವ ಹಾಗೂ ಇವುಗಳ ವಿರುದ್ಧ ಪ್ರತಿರೋಧಕ ಶಕ್ತಿಯನ್ನು ಗಳಿಸಿಕೊಳ್ಳುವ ಸಾಧ್ಯತೆಗಳೇ ಇಲ್ಲ.  

ಪ್ರಾಥಮಿಕ ಶಾಲೆಯ ಮಕ್ಕಳು ಶಾಲೆಗೆ ಹೋಗದಿರಲು ಕಾರಣವೆನಿಸುವ ಕಾಯಿಲೆಗಳಲ್ಲಿ, ಶೀತಕ್ಕೆ ಆಗ್ರ ಸ್ಥಾನ ಸಲ್ಲುತ್ತದೆ. 

ನಿಮ್ಮ ಪುಟ್ಟ ಕಂದನಿಗೆ ಶೀತ ಬಾಧಿಸಿದಾಗ ಸ್ನಾನವನ್ನು ಮಾಡಿಸಿದಲ್ಲಿ  ಥಂಡಿಯ ಬಾಧೆಯಿಂದ ಸಮಸ್ಯೆ ಇನ್ನಷ್ಟು ಉಲ್ಬಣಿಸುವುದೆಂದು ನಂಬಿ, ಟಾಲ್ಕಂ ಪೌಡರ್ ನ ಸ್ನಾನ ಮಾಡಿಸದಿರಿ. ಟಾಲ್ಕಂ ಎನ್ನುವ ಕಲ್ಲಿನ ನುಣುಪಾದ ಹುಡಿಯಿಂದ ತಯಾರಾದ ಪೌಡರ್ ಎನ್ನುವ "ಧೂಳು " , ನಿಮ್ಮ ಕಂದನ ಮೂಗು ಕಟ್ಟುವಿಕೆ,ಶೀನು ಹಾಗೂ ಕೆಮ್ಮಿನ ಬಾಧೆ ಇನ್ನಷ್ಟು ಹೆಚ್ಚಲು ಕಾರಣವೆನಿಸುವುದು. ಅದೇ ರೀತಿಯಲ್ಲಿ ಮಗುವನ್ನು ಥಂಡಿಯ ಬಾಧೆಯಿಂದ ರಕ್ಷಿಸಲು ಮತ್ತು ಬೆಚ್ಚಗೆ ಇರಿಸಲು ನೀವು ತೊಡಿಸುವ ಉಣ್ಣೆಯ ಟೋಪಿ ಮತ್ತು ಸ್ವೆಟರ್ ಗಳಲ್ಲಿ ಇರಬಹುದಾದ ಸೂಕ್ಷ್ಮಾಣು ಜೀವಿಗಳು, ಶೀತದ ತೊಂದರೆಗಳನ್ನು ಇನ್ನಷ್ಟು ಹೆಚ್ಚಿಸುತ್ತವೆ. ಇತ್ತೀಚಿಗೆ ನಡೆಸಿದ್ದ ವೈದ್ಯಕೀಯ ಅಧ್ಯಯನದ ವರದಿಯಂತೆ ಮನೆಯಲ್ಲೇ ಇರುವ ಮಕ್ಕಳಿಗಿಂತಲೂ ಬಾಲವಾಡಿಗೆ ಹೋಗುವ ಮಕ್ಕಳಲ್ಲಿ ಶೀತದ ಬಾಧೆಯು ಎರಡರಿಂದ ಮೂರು ಪಟ್ಟು ಹೆಚ್ಚಿದೆ. ಆದರೆ ಬಾಲವಾಡಿಗೆ ಹೋಗುವ ಮಕ್ಕಳು ಇದರಿಂದಾಗಿ ಗಳಿಸಿಕೊಳ್ಳುವ ಪ್ರತಿರೋಧಕ ಶಕ್ತಿಯು, ಮುಂದೆ ಈ ಮಕ್ಕಳಿಗೆ ಸಾಕಷ್ಟು ರಕ್ಷಣೆಯನ್ನು ನೀಡುತ್ತದೆ. 

ನೀವು ದಿನನಿತ್ಯ ನೋಡುವ ಟಿ. ವಿ . ಜಾಹೀರಾತುಗಳಲ್ಲಿ ತೋರಿಸುವಂತೆ ಹಣೆ,ಮೂಗು ಮತ್ತು ಎದೆಗೆ ಹಚ್ಚುವ ಔಷದಗಳಿಂದ ಅಥವಾ ಪ್ರಬಲವಾದ ಒಂದು ಮಾತ್ರೆಯ ಸೇವನೆಯಿಂದ, ಇರುಳು ಕಳೆದು ಬೆಳಗಾಗುವಷ್ಟರಲ್ಲಿ ಶೀತ ಗುಣವಾಗುವುದೆಂದು ಇವುಗಳ ತಯಾರಕರು ಘೋಷಿಸುವುದು ಅಪ್ಪಟ ಸುಳ್ಳು. ಏಕೆಂದರೆ ಈ ರೀತಿಯಲ್ಲಿ ಚಿಟಿಕೆ ಹೊಡೆಯುವಷ್ಟರಲ್ಲೇ ಶೀತವನ್ನು ಗುಣಪಡಿಸಬಲ್ಲ ಔಷದವನ್ನು ಸಂಶೋಧಿಸಿದ ವ್ಯಕ್ತಿಗೆ "ನೊಬೆಲ್  ಪ್ರಶಸ್ತಿ " ಕಟ್ಟಿಟ್ಟ ಬುತ್ತಿ !. ಆದರೂ ಇಂತಹ ಉತ್ಪ್ರೇಕ್ಷಿತ ಜಾಹೀರಾತುಗಳನ್ನು ನಂಬಿ, ಔಷದ ಅಂಗಡಿಗಳಿಂದ ದುಬಾರಿ ಬೆಲೆಯನ್ನು ತೆತ್ತು ಖರೀದಿಸುವ ಅಮಾಯಕರಿಂದಾಗಿ ಇವುಗಳ ತಯಾರಕರಿಗೆ ಕೋಟ್ಯಂತರ ರೂಪಾಯಿಗಳ ಲಾಭವಾಗುತ್ತಿರುವುದು ಮಾತ್ರ ಸತ್ಯ !. 

ಡಾ. ಸಿ. ನಿತ್ಯಾನಂದ ಪೈ,ಪುತ್ತೂರು  

Malnutrition........

                        ಮಕ್ಕಳಲ್ಲಿ ಅಪೌಷ್ಠಿಕತೆ ಮತ್ತು ಅನಾರೋಗ್ಯ 

ಪ್ರಪಂಚದ ಬಡ ಹಾಗೂ ಅಭಿವೃದ್ಧಿಶೀಲ ರಾಷ್ಟ್ರಗಳ ಅಧಿಕತಮ ಮಕ್ಕಳನ್ನು ಬಾಧಿಸುತ್ತಿರುವ ಪೌಷ್ಠಿಕ ಅಂಶಗಳ ಕೊರತೆಯು ಅನೇಕ ವ್ಯಾಧಿಗಳಿಗೆ ಕಾರಣವೆನಿಸುವುದರೊಂದಿಗೆ,ಗಣನೀಯ ಪ್ರಮಾಣದ ಮರಣಗಳಿಗೂ ಕಾರಣವೆನಿಸುತ್ತಿದೆ. ಮೂರು ತಿಂಗಳಿನ ಹಸುಗೂಸಿನಿಂದ ಹಿಡಿದು,ಐದು ವರ್ಷದವರೆಗಿನ ಮಕ್ಕಳನ್ನು ಪೀಡಿಸುವ ಈ ಸಮಸ್ಯೆಯು ದೇಶಾದ್ಯಂತ ವ್ಯಾಪಕವಾಗಿ ಕಂಡುಬರುತ್ತಿದೆ. 

ಬಿಜಾಪುರದ ಕೆಂಚವ್ವ ಪುತ್ತೂರಿನಲ್ಲಿ ಕೂಲಿಕೆಲಸ ಮಾಡುತ್ತಿದ್ದು, ತನ್ನ ಗಂಡ ಮತ್ತು ಇಬ್ಬರು ಪುಟ್ಟ ಮಕ್ಕಳೊಂದಿಗೆ ಜೋಪಡಿಯಲ್ಲಿ ವಾಸವಾಗಿದ್ದಳು. ದಿನವಿಡೀ ದುಡಿದರೂ ಆಕೆಯ ಗಳಿಕೆಯು ನಾಲ್ಕುಮಂದಿಯ ಸಂಸಾರಕ್ಕೆ ಹೊಟ್ಟೆತುಂಬಾ ಉಣ್ಣಲೂ ಸಾಲುತ್ತಿರಲಿಲ್ಲ. ಆಕೆಯ ಗಂಡನು ಸಾಕಷ್ಟು ಸಂಪಾದಿಸುತ್ತಿದ್ದರೂ, ಅದೆಲ್ಲವೂ ಕುಡಿತಕ್ಕಾಗಿಯೇ ಖರ್ಚಾಗುತ್ತಿತ್ತು. ಇದೇ ಕಾರಣದಿಂದಾಗಿ ಕೆಂಚವ್ವ ಮತ್ತು ಆಕೆಯ ಮಕ್ಕಳು, ಎಲುಬಿನ ಹಂದರದಂತೆ ಕಾಣುತ್ತಿದ್ದರು. 

ಅದೊಂದುದಿನ ತನ್ನ ಅನಾರೋಗ್ಯಪೀಡಿತ ಕಂದನನ್ನು ವೈದ್ಯರಲ್ಲಿಗೆ ಕರೆದೊಯ್ದ ಕೆಂಚವ್ವನು, ತನ್ನ ಮಗು ದಷ್ಟಪುಷ್ಟವಾಗಿ ಬೆಳೆಯುವಂತಹ ಟಾನಿಕ್ ನೀಡುವಂತೆ ಅಂಗಲಾಚಿದ್ದಳು. ಆಕೆಯ ಮಗುವಿಗೆ ಎರಡು ವರ್ಷ ವಯಸ್ಸಾಗಿದ್ದರೂ, ವಯಸ್ಸಿಗೆ ತಕ್ಕ ಬೆಳವನಿಗೆಯಿಲ್ಲದೆ ಒಂಬತ್ತು ತಿಂಗಳ ಕೂಸಿನಂತೆ ಕಾಣುತ್ತಿತ್ತು. ಕಡ್ಡಿಯಂತಹ ಕೈಕಾಲುಗಳು,ಉಬ್ಬಿದ ಹೊಟ್ಟೆ, ನಿಸ್ತೇಜ ಕಣ್ಣುಗಳು,ಸುಕ್ಕುಗಟ್ಟಿದ ಚರ್ಮದೊಂದಿಗೆ ಕೆಂಚುಕೂದಲುಗಳನ್ನು ಕಂಡ ವೈದ್ಯರಿಗೆ, ಪೌಷ್ಟಿಕಾಂಶಗಳ ತೀವ್ರ ಕೊರತೆಯೇ ಮಗುವಿನ ಅನಾರೋಗ್ಯಕ್ಕೆ ಕಾರಣವೆಂದು ತಿಳಿಯಿತು. 

ನಾಲ್ಕಾರು ಮನೆಗಳಲ್ಲಿ ಕಸ-ಮುಸುರೆ ಕೆಲಸಮಾಡಿ ಒಂದಿಷ್ಟು ಸಂಪಾದಿಸುತ್ತಿದ್ದ ಕೆನ್ಚವ್ವನಿಗೆ,ತನ್ನ ಇಬ್ಬರು ಮಕ್ಕಳನ್ನು ಸಾಕಿಸಲಹುವುದು ಅಕ್ಷರಶಃ ಅಸಾಧ್ಯವೆನಿಸುತ್ತಿತ್ತು. ಕತ್ತಲಾಗುತ್ತಲೇ ಕಂಠಪೂರ್ತಿ ಕುಡಿದುಬರುತ್ತಿದ್ದ ಆಕೆಯ ಗಂಡನು ಮನೆಯ ಖರ್ಚಿಗೆ ಹಣವನ್ನು ನೀಡದಿದ್ದರೂ, ಹೆಂಡತಿಯನ್ನು ಹೊಡೆದು ಬಡಿದು ತನಗೆ ಊಟ ಹಾಕುವಂತೆ ಪೀಡಿಸುತ್ತಿದ್ದನು. ಇದರಿಂದಾಗಿ ಆಕೆ ದುಡಿದ ಹಣವು ಸಂಸಾರದ ಅರೆಹೊಟ್ಟೆಗೂ ಸಾಲುತ್ತಿರಲಿಲ್ಲ. 

ದಿನದಲ್ಲಿ ಎರಡುಬಾರಿ ಬೇಯಿಸುತ್ತಿದ್ದ ಗಂಜಿಯನ್ನು ಮಕ್ಕಳೊಂದಿಗೆ ಹಂಚಿಕೊಂಡು ಉಣ್ಣುತ್ತಿದ್ದರೂ, ಯಾರೊಬ್ಬರ ಹೊಟ್ಟೆಯೂ ತುಂಬುತ್ತಿರಲಿಲ್ಲ. ಅರೆಹೊಟ್ಟೆಯಲ್ಲಿ ದಿನವಿಡೀ ದುಡಿಯುತ್ತಿದ್ದ ಕೃಶಕಾಯದ  ಕೆಂಚವ್ವನ ಬತ್ತಿದ ಎದೆಯಲ್ಲಿ ಸಿಕ್ಕಿದಷ್ಟು ಹಾಲೇ, ಕಿರಿಯ ಮಗುವಿನ ಏಕಮಾತ್ರ ಆಹಾರವಾಗಿದ್ದ ದಿನಗಳೂ ಅಪರೂಪವಾಗಿರಲಿಲ್ಲ. ಹೊಟ್ಟೆ ತುಂಬುವಷ್ಟು ಆಹಾರವೇ ಇಲ್ಲದಿದ್ದ ಮೇಲೆ ಪೌಷ್ಟಿಕಾಂಶ ಭರಿತ ಹಾಲು,ತರಕಾರಿ ಮತ್ತು ಹಣ್ಣು ಹಂಪಲುಗಳನ್ನು ಖರೀದಿಸುವ ಸಾಧ್ಯತೆಗಳೇ ಇರಲಿಲ್ಲ. ಇವೆಲ್ಲಾ ಕಾರಣಗಳಿಂದ ಕೆಂಚವ್ವ ಮತ್ತು ಆಕೆಯ ಇಬ್ಬರು ಮಕ್ಕಳು, ಪೌಷ್ಟಿಕಾಂಶಗಳ ತೀವ್ರ ಕೊರತೆಯಿಂದಾಗಿ ಸದಾ ಅನಾರೋಗ್ಯದಿಂದ ಬಳಲುತ್ತಿದ್ದರು. 

ಕೆಂಚವ್ವನ ಸ್ಥಿತಿಗತಿಗಳನ್ನು ಅರಿತಿದ್ದ ವೈದ್ಯರು ಆಕೆಯ ಕಂದನಿಗೆ ಅವಶ್ಯಕ ಔಷದಗಳನ್ನು ಉಚಿತವಾಗಿ ನೀಡಿದ್ದರೂ, ಈ ಸಮಸ್ಯೆಯ ಪರಿಹಾರಕ್ಕೆ ನಿಶ್ಚಿತವಾಗಿಯೂ ಪೋಷಕಾಂಶಗಳಿಂದ ಸಮೃದ್ಧವಾಗಿರುವ ಆಹಾರಸೇವನೆ ಅನಿವಾರ್ಯವಾಗಿತ್ತು. ಇಂತಹ ಆಹಾರದ ಅಭಾವದಿಂದಾಗಿಯೇ ಆಕೆಯ ಮಗುವು ಒಂದೆರಡು ತಿಂಗಳುಗಳ ಬಳಿಕ ಮೃತಪಟ್ಟಿತ್ತು. 

ವಿಶ್ವವ್ಯಾಪಿ ಸಮಸ್ಯೆ 

ಕುಪೋಷಣೆಯೇ ಭಾರತವನ್ನು ಬಿಟ್ಟು ತೊಲಗು, ಎನ್ನುವ ಅಮೀರ್ ಖಾನ್ ನ ಜಾಹೀರಾತೊಂದನ್ನು ಟೆಲಿವಿಶನ್ ನಲ್ಲಿ ನೀವೂ ಕಂಡಿರಲೇಬೇಕು. ಜಾಹೀರಾತಿನಲ್ಲಿ ಬಳಸಿರುವ "ಕುಪೋಷಣೆ" ಯು ಅಪೌಷ್ಟಿಕತೆಯೇ ಹೊರತು ಬೇರೇನೂ ಅಲ್ಲ. ಆದರೆ ಅಮೀರ್ ಖಾನ್ ಹೇಳಿದೊಡನೆ ಈ ಸಮಸ್ಯೆಯು ಭಾರತವನ್ನು ಬಿಟ್ಟು ತೊಲಗುವ ಸಾಧ್ಯತೆಗಳೂ ಇಲ್ಲ. 

ಜಾಗತಿಕ ಮಟ್ಟದಲ್ಲಿ ಅಪೌಷ್ಟಿಕತೆಯಿಂದಾಗಿ ಉದ್ಭವಿಸುತ್ತಿರುವ ಮರಾಸ್ಮಸ್ , ಕ್ವಾಷಿಯಾರ್ಕರ್, ಮರಾಸ್ಮಿಕ್ ಕ್ವಾಷಿಯಾರ್ಕರ್, ಸ್ಕರ್ವಿ, ರಿಕೆಟ್ಸ್, ರಕ್ತಹೀನತೆ ಇತ್ಯಾದಿ ವ್ಯಾಧಿಗಳಿಗೆ, ಜಗತ್ತಿನಾದ್ಯಂತ  ವರ್ಷಂಪ್ರತಿ ಲಕ್ಷಾಂತರ ಮಕ್ಕಳು ಬಲಿಯಾಗುತ್ತಾರೆ. ಕಿತ್ತುತಿನ್ನುವ ಬಡತನ,ನಿರುದ್ಯೋಗ, ಅನಾರೋಗ್ಯ, ಅಜ್ಞಾನ, ಮೂಢನಂಬಿಕೆಗಳು ಮತ್ತು ಗೊಡ್ಡು ಸಂಪ್ರದಾಯಗಳೊಂದಿಗೆ, ಅನಿಯಂತ್ರಿತವಾಗಿ ಹೆಚ್ಚುತ್ತಲೇ ಇರುವ ಜನಸಂಖ್ಯೆಯಿಂದಾಗಿ ಸರಕಾರವು ಇದರ ಪರಿಹಾರದ ಸಲುವಾಗಿ  ಹಮ್ಮಿಕೊಳ್ಳುವ ಬಹುತೇಕ ಯೋಜನೆಗಳು ವಿಫಲಗೊಳ್ಳುತ್ತಿವೆ. 

ಅಮಾಯಕ ಮಕ್ಕಳ ಶಾರೀರಿಕ ಮತ್ತು ಮಾನಸಿಕ ಬೆಳವಣಿಗೆಗಳನ್ನು ಕುಂಠಿತಗೊಳಿಸಬಲ್ಲ ಅತ್ಯಲ್ಪ ಹಾಗೂ ಅಲ್ಪ ಪ್ರಮಾಣದ ಅಪೌಷ್ಟಿಕತೆಯು, ಅನೇಕ ಸಂದರ್ಭಗಳಲ್ಲಿ ಅರೆವೈದ್ಯಕೀಯ ಹಾಗೂ ಅರೆವೈದ್ಯಕೀಯ ಸಿಬಂದಿಗಳಿಗೂ ಪತ್ತೆಹಚ್ಚಲು ಆಗುವುದಿಲ್ಲ. ತತ್ಪರಿಣಾಮವಾಗಿ ಸಮಸ್ಯೆ ತೀವ್ರವಾಗಿ ಉಲ್ಬಣಿಸಿದ ಬಳಿಕವೇ ಪತ್ತೆಯಾಗುವುದರಿಂದ ಸೂಕ್ತ ಚಿಕಿತ್ಸೆಯನ್ನು ನೀಡುವುದು ಸುಲಭಸಾಧ್ಯವೇನಲ್ಲ. 

ಸಮಸ್ಯೆಯ ಮೂಲ 

ಸಾಮಾನ್ಯವಾಗಿ ಪುಟ್ಟ ಕಂದನ ಶಾರೀರಿಕ ಮತ್ತು ಮಾನಸಿಕ ಬೆಳವಣಿಗೆಗಳಿಗೆ ಸ್ತನ್ಯಪಾನ ಮತ್ತು ತದನಂತರ ಪ್ರೋಟೀನ್, ಜೀವಸತ್ವಗಳು,ಖನಿಜ-ಲವಣಗಳು,ಅಯೋಡಿನ್ ಇತ್ಯಾದಿಗಳು ಅತೀ ಅವಶ್ಯಕ ಎನಿಸುತ್ತವೆ. ಮಕ್ಕಳು ಸೇವಿಸುವ ಆಹಾರದಲ್ಲಿ ಇವೆಲ್ಲವುಗಳ ಅಥವಾ ಇವುಗಳಲ್ಲಿ ಒಂದೆರಡು ಅಂಶಗಳ ಕೊರತೆಯಿಂದಾಗಿಯೂ, ಅಪೌಷ್ಟಿಕತೆ ಉದ್ಭವಿಸಬಲ್ಲದು. ಬಹುತೇಕ ಕುಟುಂಬಗಳಲ್ಲಿ ಬಡತನದಿಂದಾಗಿಯೇ ತಲೆದೋರುವ ಈ ಸಮಸ್ಯೆಯು, ಇತ್ತೀಚಿಗೆ ಶ್ರೀಮಂತರ ಕುಟುಂಬಗಳಲ್ಲಿ ಮತ್ತು ಕಾಲೇಜು ಕನ್ಯೆಯರಲ್ಲಿ ಪತ್ತೆಯಾಗುತ್ತಿದೆ. ಭಾರತೀಯರ ಆಹಾರ ಸೇವನಾ ಪದ್ದತಿಯಲ್ಲಿ ಪಾಶ್ಚಾತ್ಯರ ಪ್ರಭಾವ ಹಾಗೂ ತಮ್ಮ ಮೈಮಾಟವನ್ನು ಆಕರ್ಷಕವಾಗಿ ಇರಿಸಿಕೊಳ್ಳಲು ಯುವತಿಯರು ಅನುಸರಿಸುವ "ಡಯಟಿಂಗ್ " ಕೂಡಾ ಇದಕ್ಕೆ ಕಾರಣವಾಗಿರಬಹುದು!. 

ಹಸುಗೂಸುಗಳಿಗೆ ಕಾರಣಾಂತರಗಳಿಂದ ಅವಶ್ಯಕ ಪ್ರಮಾಣದ ತಾಯಿಯ ಮೊಲೆಹಾಲು ಅಥವಾ ಹಸುವಿನ ಹಾಲು ದೊರೆಯದೇ ಇರುವುದರಿಂದ ಮತ್ತು ಕೆಲ ಮಾತೆಯರು ತಮ್ಮ ಕಂದನಿಗೆ ಎರಡು ವರ್ಷ ತುಂಬುವ ತನಕ ಒತ್ತಾಯದಿಂದ ಎದೆಹಾಲು ಉಣಿಸುವುದರಿಂದ , ಇಂತಹ ಮಕ್ಕಳು ಇತರ ಆಹಾರಗಳನ್ನು ಸೇವಿಸಲು ನಿರಾಕರಿಸುವುದರಿಂದಲೂ ಪೋಷಕಾಂಶಗಳ ನ್ಯೂನತೆ ಬಾಧಿಸಬಲ್ಲದು. ಒಂದೆರಡು ವರ್ಷ ವಯಸ್ಸಿನ ಮಕ್ಕಳು ಅವಶ್ಯಕ ಪ್ರಮಾಣದ ಆಹಾರಪದಾರ್ಥಗಳನ್ನು ನಿರಾಕರಿಸಿ, ಕೇವಲ ಒಂದೆರಡು ಬಿಸ್ಕಿಟ್,ರಸ್ಕ್ ಅಥವಾ ಬಟರ್ ಸೇವಿಸುವುದು ಅಥವಾ ಕಾಫಿ-ಚಹಾ ಗಳಂತಹ ಪೇಯಗಳನ್ನು ಕುಡಿದು ಹೊಟ್ಟೆ ತುಂಬಿಸಿಕೊಳ್ಳುವುದು ಮತ್ತು ಕಾಲೇಜು ಕನ್ಯೆಯರು ಬಳುಕುವ ಬಳ್ಳಿಯಂತಹ ಅಂಗಸೌಷ್ಟವವನ್ನು ಗಳಿಸಲು ಡಯಟಿಂಗ್ ಮಾಡುವುದು ಕೂಡಾ ಈ ಸಮಸ್ಯೆಯನ್ನು ಹುಟ್ಟುಹಾಕಲು ಕಾರಣವೆನಿಸುತ್ತದೆ. 

ಇದಲ್ಲದೆ ಗ್ರಾಮೀಣ ಪ್ರದೇಶಗಳಲ್ಲಿ ಶೌಚಾಲಯಗಳಿಲ್ಲದ ಕಾರಣದಿಂದಾಗಿ ಹಾಗೂ ವೈಯುಕ್ತಿಕ ಸ್ವಚ್ಚತೆಯನ್ನು ಪರಿಪಾಲಿಸದೇ ಇರುವುದರಿಂದ ಉದ್ಭವಿಸಬಲ್ಲ "ಜಂತು ಹುಳ " ಗಳ ಪೀಡೆಯೂ ಪೌಷ್ಟಿಕಾಂಶಗಳ ನ್ಯೂನತೆ, ರಕ್ತಹೀನತೆ ಮುಂತಾದ ತೊಂದರೆಗಳಿಗೆ ಕಾರಣವೆನಿಸುತ್ತಿದೆ. ಪೌಷ್ಟಿಕಾಂಶ ರಹಿತ ಆಹಾರಗಳನ್ನೇ ಸೇವಿಸಿದ ಗರ್ಭಿಣಿಯರಲ್ಲಿ ಹುಟ್ಟುವ ಮಕ್ಕಳೂ ಇದೇ ಕಾರಣದಿಂದಾಗಿ ಕಡಿಮೆ ತೂಕ,ಕುಂಠಿತ ಬೆಳವಣಿಗೆ ಮತ್ತಿತರ ಸಮಸ್ಯೆಗಳಿಂದ ಬಳಲುತ್ತಾರೆ. 

ಪರಿಹಾರವೇನು?

ಅದೇ ತಾನೇ ಜನಿಸಿದ ಕೂಸಿಗೆ ಮುಂದಿನ ಆರು ತಿಂಗಳುಗಳ ಕಾಲ ತಾಯಿಯ ಮೊಲೆಹಾಲೇ ಪರಿಪೂರ್ಣ ಆಹಾರವಾಗಿರುತ್ತದೆ. ಕಾರಣಾಂತರಗಳಿಂದ ತಾಯಿಯ ಎದೆಹಾಲು ದೊರೆಯದೇ ಇದ್ದಲ್ಲಿ, ಇದಕ್ಕೆ ಬದಲಾಗಿ ಹಸುವಿನ ಹಾಲನ್ನು ನೀಡಬಹುದು. ಆರು ತಿಂಗಳು ಕಳೆದ ಬಳಿಕ ಬೇಯಿಸಿದ ಅರೆಘನ ಆಹಾರ,ಆಯ್ದ ಹಣ್ಣುಗಳು-ಹಣ್ಣಿನ ರಸಗಳನ್ನು ನೀಡಲು ಆರಂಭಿಸಿದರೂ,ಇದರೊಂದಿಗೆ ತಾಯಿಯ ಎದೆಹಾಲನ್ನು ನೀಡಲೇಬೇಕು. ಕ್ರಮೇಣ ಬೇಯಿಸಿದ ತರಕಾರಿ,ಬೇಳೆಕಾಳುಗಳು, ಗೋಧಿ-ರಾಗಿಗಳಿಂದ ಮನೆಯಲ್ಲೇ ಸಿದ್ಧಪಡಿಸಿದ ಅಥವಾ ಅನಿವಾರ್ಯವೆನಿಸಿದಲ್ಲಿ ಮಾರುಕಟ್ಟೆಯಲ್ಲಿ ದೊರೆಯುವ ಶಿಶು ಆಹಾರಗಳನ್ನು ನೀಡುತ್ತ ಬಂದು, ಒಂದು ವರ್ಷ ವಯಸ್ಸಾದ ಬಳಿಕ ನಾವು ಸೇವಿಸುವ ಆದರೆ ಮಗು ಜೀರ್ಣಿಸಿಕೊಳ್ಳಬಲ್ಲ ಆಹಾರಗಳನ್ನು ನೀಡಬಹುದು. 

ನಾವು ಪ್ರತಿನಿತ್ಯ ಸೇವಿಸುವ ದವಸಧಾನ್ಯಗಳು,ಬೇಳೆಕಾಳುಗಳು,ಹಸಿರುಸೊಪ್ಪು- ತರಕಾರಿಗಳು,ಹಣ್ಣುಹಂಪಲುಗಳು, ಹಾಲು,ಮೊಸರು,ಬೆಣ್ಣೆ,ತುಪ್ಪ,ಎಣ್ಣೆ,ಮೊಟ್ಟೆ,ಮೀನು ಮತ್ತು ಮಾಂಸಗಳಲ್ಲಿ ವಿವಿಧರೀತಿಯ ಪೋಷಕಾಂಶಗಳು ಇರುತ್ತವೆ. ಇವುಗಳನ್ನು ಸೂಕ್ತ ಪ್ರಮಾಣದಲ್ಲಿ, ಹಿತವಾಗಿ-ಮಿತವಾಗಿ ಸೇವಿಸುವುದರಿಂದ ನಮ್ಮ ಶರೀರದ ಬೆಳವಣಿಗೆ,ಶರೀರಕ್ಕೆ ಬೇಕಾದ ಶಕ್ತಿಗಳೊಂದಿಗೆ,ಆರೋಗ್ಯದ ರಕ್ಷಣೆಯೂ ಸುಲಭಸಾಧ್ಯ. ಇದೇ ಕಾರಣದಿಂದಾಗಿ "ಸಮತೋಲಿತ ಆಹಾರ " ಸೇವನೆಯನ್ನು ದಿನನಿತ್ಯ ಪರಿಪಾಲಿಸಿದಲ್ಲಿ, ಪೌಷ್ಟಿಕಾಂಶಗಳ ಕೊರತೆ ಹಾಗೂ ತತ್ಪರಿಣಾಮವಾಗಿ ಉದ್ಭವಿಸಬಲ್ಲ ವ್ಯಾಧಿಗಳನ್ನು ಸುಲಭದಲ್ಲೇ ತಡೆಗಟ್ಟಬಹುದಾಗಿದೆ. 

ಡಾ. ಸಿ . ನಿತ್ಯಾನಂದ ಪೈ,ಪುತ್ತೂರು   

Beware of Shampoos

                              ಕೇಶರಕ್ಷಕ ಶಾಂಪೂಗಳ ಬಳಕೆ ಸುರಕ್ಷಿತವೇ ?

ಒಂದೆರಡು ದಶಕಗಳ ಹಿಂದಿನ ತನಕ ಬಹುತೇಕ ಭಾರತೀಯರು ತಮ್ಮ ಕೂದಲುಗಳನ್ನು ಸ್ವಚ್ಚವಾಗಿಸಲು ಸೀಗೆಪುಡಿ ಅಥವಾ ಸಾಮಾನ್ಯ ಸ್ನಾನದ ಸಾಬೂನುಗಳನ್ನು ಬಳಸುತ್ತಿದ್ದರು. ಆದರೆ ಇತ್ತೀಚಿನ ಕೆಲವರ್ಷಗಳಿಂದ ಅಧಿಕತಮ ಭಾರತೀಯರು ತಮ್ಮ ತಲೆಗೂದಲಿನ ಸಂರಕ್ಷಣೆಗಾಗಿ, ವೈವಿಧ್ಯಮಯ ಶಾಂಪೂಗಳನ್ನು ಉಪಯೋಗಿಸಲು ಆರಂಭಿಸಿದ್ದಾರೆ. ವಿಶೇಷವೆಂದರೆ ಶಾಂಪೂಗಳ ಬಗ್ಗೆ ಏನೇನೂ ತಿಳಿದಿರದ ಅನಕ್ಷರಸ್ಥರೂ, ಇದೀಗ ಗೂಡಂಗಡಿಗಳಲ್ಲೂ ಒಂದೆರಡು ರೂಪಾಯಿಗಳಿಗೆ ಲಭಿಸುವ ಶಾಂಪೂ ಸ್ಯಾಶೆಗಳನ್ನೇ ಖರೀದಿಸಿ ಬಳಸುತ್ತಿದ್ದಾರೆ!. 

ಜಾಹೀರಾತುಗಳ ಪ್ರಭಾವ 

ಜನಸಾಮಾನ್ಯರು ಪ್ರತಿನಿತ್ಯ ಟೆಲಿವಿಶನ್ ನಲ್ಲಿ ವೀಕ್ಷಿಸುವ ಅತ್ಯಾಕರ್ಷಕ ಜಾಹೀರಾತುಗಳು, ಕಾಲಕ್ರಮೇಣ ಇವರ ಮನಸ್ಸಿನ ಮೇಲೆ ಅಚ್ಚಳಿಯದ ಪರಿಣಾಮವನ್ನು ಬೀರುತ್ತವೆ. ಅದರಲ್ಲೂ ಸಿನೆಮಾತಾರೆಯರು ಅಥವಾ ಖ್ಯಾತ ರೂಪದರ್ಶಿಗಳು ಅನುಮೋದಿಸುವ ಸೌಂದರ್ಯ ಪ್ರಸಾದನಗಳ ಜಾಹೀರಾತುಗಳು ಯುವಜನರನ್ನು ಸಂಪೂರ್ಣವಾಗಿ ಮರುಳುಗೊಳಿಸುತ್ತವೆ. ಆದರೆ ಈ ವಾಣಿಜ್ಯ ಉತ್ಪನ್ನಗಳ ತಯಾರಕರು, ತಮ್ಮ ಉತ್ಪನ್ನಗಳ ಅದ್ಭುತ ಪರಿಣಾಮಗಳ ಬಗ್ಗೆ ಕಹಳೆಯನ್ನು ಊದಿದರೂ, ಇವುಗಳ ಅಡ್ಡ ಅಥವಾ ದುಷ್ಪರಿಣಾಮಗಳ ಬಗ್ಗೆ ಚಕಾರವೆತ್ತುವುದಿಲ್ಲ. 

ಉದಾಹರಣೆಗೆ ನಿಮ್ಮ ಸಿಕ್ಕುಗಟ್ಟಿದ ಕೂದಲುಗಳನ್ನು ಬಿಡಿಸಬಲ್ಲ, ಕೂದಲುಗಳು ಉದುರುವುದನ್ನು ಮತ್ತು ತಲೆಹೊಟ್ಟನ್ನು ತಡೆಗಟ್ಟಬಲ್ಲ, ಕೂದಲುಗಳಿಗೆ ಆಕರ್ಷಕ ಹೊಳಪನ್ನು ನೀಡಬಲ್ಲ ಹಾಗೂ ಬೆಳವಣಿಗೆಯನ್ನು ಹೆಚ್ಚಿಸಬಲ್ಲ ಮತ್ತು ನಿಮ್ಮ ಮುದ್ದುಕಂದನ ಕಣ್ಣುಗಳಲ್ಲಿ ನೀರಿಳಿಸದಂತಹ ವಿಸ್ಮಯಕಾರೀ ಶಾಂಪೂಗಳ ಗುಣಗಾನಗಳನ್ನು, ಇವುಗಳ ಜಾಹೀರಾತುಗಳಲ್ಲಿ ಕಂಡಿರಲೇಬೇಕು, ಜೊತೆಗೆ ಇವುಗಳಿಗೆ ಮರುಳಾಗಿ ಒಂದೆರೆಡು ರೂಪಾಯಿ ಬೆಲೆಯ ಸ್ಯಾಶೆ ಅಥವಾ ದುಬಾರಿ ಬೆಲೆಯ ಬಾಟಲಿಗಳನ್ನು ಖರೀದಿಸಿ ಬಳಸಿರಬಹುದು. ಆದರೆ ಇವುಗಳನ್ನು ಅತಿಯಾಗಿ ಬಳಸಿದಲ್ಲಿ ಉದ್ಭವಿಸಬಲ್ಲ ಆರೋಗ್ಯದ ಸಮಸ್ಯೆಗಳ ಬಗ್ಗೆ ಪಾಯಃ ನಿಮಗೂ ತಿಳಿದಿರಲಾರದು. ಅದೇ ರೀತಿಯಲ್ಲಿ ಇವುಗಳ ತಯಾರಿಕೆಯಲ್ಲಿ ಬಳಸಿರುವ ದ್ರವ್ಯಗಳ ಬಗ್ಗೆ ತಿಳಿದಿರುವ ಸಾಧ್ಯತೆಗಳೇ ಇಲ್ಲ. 

ಅನಾರೋಗ್ಯಕರ "ನೊರೆಕಾರಕ "

ಶಾಂಪೂಗಳನ್ನು ನೀವು ಬಳಸಿದಾಗ ಉತ್ಪನ್ನವಾಗುವ ಅಪಾರ ಪ್ರಮಾಣದ "ನೊರೆ " ಯನ್ನು ಉಂಟುಮಾಡಲು ಇವುಗಳಲ್ಲಿ "ಡೈ ಇಥನೊಲಮೈನ್ " (DEA) ಎನ್ನುವ ರಾಸಾಯನಿಕವನ್ನು ಬಳಸುತ್ತಾರೆ. ಇದರ ಅತಿಯಾದ ಬಳಕೆಯು ನಿಮ್ಮ ಆರೋಗ್ಯಕ್ಕೆ ಅಪಾಯಕಾರಿಯಾಗಿ ಪರಿಣಮಿಸಬಲ್ಲದು. ಈ ರಾಸಾಯನಿಕದ ಬಳಕೆಯಿಂದ ಕ್ಯಾನ್ಸರ್ ಉದ್ಭವಿಸುವ ಸಾಧ್ಯತೆಗಳ ಬಗ್ಗೆ 2006 ರಲ್ಲಿ ಅಧ್ಯಯನವನ್ನು ನಡೆಸಲಾಗಿತ್ತು. ತದನಂತರ ಇದು ಮನುಷ್ಯರ ಮೆದುಳಿನ ಮೇಲೆ ಬೀರಬಲ್ಲ ದುಷ್ಪರಿಣಾಮಗಳ ಬಗ್ಗೆಯೂ ಪ್ರಯೋಗಗಳನ್ನು ನಡೆಸಲಾಗಿತ್ತು. 

ಗರ್ಭ ಧರಿಸಿದ್ದ ಇಲಿಗಳ ಚರ್ಮದ ಮೇಲೆ ಡೈ ಇಥನೊಲಮೈನ್ ರಾಸಾಯನಿಕವನ್ನು ಹಲವಾರು ದಿನಗಳ ಕಾಲ ಲೇಪಿಸಿ ನಡೆಸಿದ್ದ ಅಧ್ಯಯನ-ಪ್ರಯೋಗಗಳಿಂದ, ಇವುಗಳ ಮೆದುಳಿನ ಜೀವಕಣಗಳ ಬೆಳವಣಿಗೆ ಕುಂಠಿತವಾಗುವುದು ಹಾಗೂ ಅತಿಯಾಗಿ ನಶಿಸುವುದು ತಿಳಿದುಬಂದಿತ್ತು. 

ಸಾಮಾನ್ಯವಾಗಿ ಗರ್ಭಿಣಿ ಸ್ತ್ರೀಯರಿಗೆ ತಮ್ಮ ಗರ್ಭದಲ್ಲಿರುವ ಭ್ರೂಣಕ್ಕೆ ಪೂರೈಸಲು ತುಸು ಅಧಿಕ ಪ್ರಮಾಣದ ಕೋಲಿನ್ (choline) ನ ಅವಶ್ಯಕತೆ ಇರುತ್ತದೆ. ಗರ್ಭಸ್ಥ ಶಿಶುವಿನ ಶಾರೀರಿಕ ಬೆಳವಣಿಗೆಗೆ ಅತ್ಯವಶ್ಯಕವೆನಿಸುವ ಈ ಪೋಷಕಾಂಶವನ್ನು, ತಾಯಿಯ ಶರೀರವು ಹೀರಿಕೊಳ್ಳುವುದನ್ನು  ಡೈ ಇಥನೊಲಮೈನ್ ತಡೆಗಟ್ಟುತ್ತದೆ. ತತ್ಪರಿಣಾಮವಾಗಿ ಶಿಶುವಿನ ಶಾರೀರಿಕ ಬೆಳವಣಿಗೆಯು ಸ್ವಾಭಾವಿಕವಾಗಿ ಕ್ಷಯಿಸುತ್ತದೆ.

 ಫೆಡರೇಶನ್  ಆಫ್ ಅಮೇರಿಕನ್ ಸೋಸೈಟೀಸ್ ಫಾರ್ ಏಕ್ಸ್ಪರಿಮೆಂಟಲ್ ಬಯಾಲಜಿ ಎನ್ನುವ ಸಂಸ್ಥೆಯು 2006 ರ ಫಾಸೆಮ್ ಜರ್ನಲ್ ನಲ್ಲಿ ಪ್ರಕಟಿಸಿದ್ದ ಈ ಅಧ್ಯಯನದ ವರದಿಗಳು ದಿಗ್ಭ್ರಮೆ ಹುಟ್ಟಿಸುವಂತಿದೆ. ಮಾನವನ ಮೆದುಳಿನ ಮೇಲೆ ಹಾಗೂ ಗರ್ಭಸ್ಥ ಶಿಶುವಿನ ಮೇಲೆ ಡೈ ಇಥನೊಲಮೈನ್ ಬೀರಬಲ್ಲ  ದುಷ್ಪರಿಣಾಮಗಳ ಬಗ್ಗೆ ಸಾಕಷ್ಟು ಅಧ್ಯಯನಗಳು ನಡೆದಿವೆ. ಈ ರಾಸಾಯನಿಕವನ್ನು ಶಾಂಪೂಗಳಲ್ಲದೇ , ಕೈತೊಳೆಯಲು ಬಳಸುವ ಸೋಪುಗಳು,ಸೋಪಿನ ದ್ರಾವಣಗಳು ಮತ್ತು ಕೆಶವಿನ್ಯಾಸಕ್ಕೆ ಉಪಯುಕ್ತವೆಂದು ನೀವು ನಂಬಿರುವ "ಹೇರ್ ಸ್ಪ್ರೇ" ಗಳ ತಯಾರಿಕೆಯಲ್ಲೂ ಬಳಸುತ್ತಾರೆ. ವಿಶೇಷವೆಂದರೆ ಜಗತ್ತಿನ ದೊಡ್ಡಣ್ಣ ಎನಿಸಿರುವ ಅಮೇರಿಕಾದಲ್ಲಿ, ಗತದಶಕದಲ್ಲಿ ಪ್ರತಿವರ್ಷ ಒಂದು ಲಕ್ಷ ಟನ್  ಡೈ ಇಥನೊಲಮೈನ್ ಮಾರಾಟವಾಗುತ್ತಿತ್ತು!. 

ಬೇಬಿ ಶಾಂಪೂ! 

ಸುಪ್ರಸಿದ್ಧ ಅಂತರ ರಾಷ್ಟ್ರೀಯ ಸಂಸ್ಥೆಯೊಂದು ಭಾರತವೂ ಸೇರಿದಂತೆ ಜಗತ್ತಿನ ಅನೇಕ ರಾಷ್ಟ್ರಗಳಲ್ಲಿ ಪುಟ್ಟ ಕಂದಮ್ಮಗಳ ಸಲುವಾಗಿಯೇ ಶಾಂಪೂವೊಂದನ್ನು ಮಾರಾಟ ಮಾಡುತ್ತಿದೆ. ಈ ಉತ್ಪನ್ನವನ್ನು ಬಳಸುವುದರಿಂದ ನಿಮ್ಮ ಪುಟ್ಟ ಕಂದನ ಕಣ್ಣುಗಳಲ್ಲಿ ನೀರು ಬರುವ ಸಾಧ್ಯತೆಗಳೇ ಇಲ್ಲವೆಂದು ಸಂಸ್ಥೆ ತನ್ನ ಜಾಹೀರಾತುಗಳಲ್ಲಿ ಘಂಟಾಘೋಷವಾಗಿ ಸಾರುತ್ತಿತ್ತು. ಆದರೆ ಅಮೇರಿಕಾದ ಗ್ರಾಹಕ ರಕ್ಷಣಾ ಸಂಸ್ಥೆಯೊಂದು ನಡೆಸಿದ್ದ ಪ್ರಯೋಗದ ಪರಿಣಾಮವಾಗಿ, ಈ ಉತ್ಪನ್ನದಲ್ಲಿ ಅಪಾಯಕಾರಿ ರಾಸಾಯನಿಕಗಳ ಇರುವಿಕೆ ಪತ್ತೆಯಾಗಿತ್ತು. 

ಪುಟ್ಟ ಕಂದಮ್ಮಗಳ ಸಲುವಾಗಿಯೇ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗಿದ್ದ ಈ ಶಾಂಪೂವಿನಲ್ಲಿ ಫೋರ್ಮಲ್  ಡಿಹೈಡ್ ನ್ನು ಬಿಡುಗಡೆ ಮಾಡುವ ಸಂರಕ್ಷಕವಾದ ಕ್ವಾಟರ್ನಿಯಂ -15 ಹಾಗೂ ರಾಸಾಯನಿಕ ಉಪ ಉತ್ಪನ್ನವಾಗಿರುವ 1,4-ಡೈ ಒಕ್ಟೆನ್  ಗಳಿದ್ದು, ಇವೆರಡೂ ರಾಸಾಯನಿಕಗಳು ಕ್ಯಾನ್ಸರ್ ಕಾರಕಗಳೆಂದು ಸಾಬೀತಾಗಿವೆ. ದ ಫೆಡರಲ್ ಕನ್ಸ್ಯೂಮರ್ ಪ್ರೊಡಕ್ಟ್  ಸೇಫ್ಟಿ ಕಮಿಷನ್, ಈ ವಿಷಯದಲ್ಲಿ ಎಚ್ಚರಿಕೆಯನ್ನು ನೀಡಿದೆ. ಈ ಬಗ್ಗೆ ಸಾಕಷ್ಟು ವಿರೋಧ- ಪ್ರತಿಭಟನೆಗಳು ವ್ಯಕ್ತವಾದ ಬಳಿಕ,ಇದರ ತಯಾರಕರು ತಮ್ಮ ಉತ್ಪನ್ನದಲ್ಲಿರುವ ಈ ಅಪಾಯಕಾರಿ ರಾಸಾಯನಿಕದ ಪ್ರಮಾಣವನ್ನು "ಪತ್ತೆಹಚ್ಚಲು ಅಸಾಧ್ಯ" ಎನಿಸುವಷ್ಟು ಕಡಿಮೆ ಮಾಡುವುದಾಗಿ ಘೋಷಿಸಿದೆ!. 2009 ರಲ್ಲೇ ಅನೇಕ ಗ್ರಾಹಕ, ವೈದ್ಯಕೀಯ ಮತ್ತು ಅರೆವೈದ್ಯಕೀಯ ಸಂಘಟನೆಗಳು ಸಂಸ್ಥೆಗೆ ಪತ್ರಗಳನ್ನು ಬರೆದು ಪ್ರತಿಭಟನೆಯನ್ನು ವ್ಯಕ್ತಪಡಿಸಿದ್ದ ಪರಿಣಾಮವಾಗಿ ಇದರ ತಯಾರಕರು ಈ ನಿರ್ಧಾರವನ್ನು ತಳೆದಿದ್ದರೂ, ಅಪಾಯಕಾರಿ ರಾಸಾಯನಿಕದ ಬಳಕೆಯನ್ನೇ ನಿಲ್ಲಿಸಲು ಸಿದ್ಧರಿರಲಿಲ್ಲ!. 

ಪ್ರಸ್ತುತ ಈ ಸಂಸ್ಥೆಯು ಬೇರೆಬೇರೆ ದೇಶಗಳಲ್ಲಿ ಬೇರೆಬೇರೆ ಪದ್ದತಿಯನ್ನು ಅನುಸರಿಸುತ್ತಿದ್ದು, ತನ್ನ ಉತ್ಪನ್ನಗಳಲ್ಲಿನ ಅಪಾಯಕಾರಿ ರಾಸಾಯನಿಕಗಳ ಬಳಕೆಯನ್ನು ನಿಲ್ಲಿಸಲು ಹಿಂಜರಿಯುತ್ತಿರುವುದು ಏಕೆಂದು ಯಾರಿಗೂ ತಿಳಿದಿಲ್ಲ. ಆದರೆ ಇಂದಿಗೂ ಈ ಸಂಸ್ಥೆಯ ಉತ್ಪನ್ನಗಳನ್ನು ತಮ್ಮ ಪುಟ್ಟ ಕಂದನಿಗಾಗಿ, ದುಬಾರಿ ಬೆಲೆಯನ್ನು ತೆತ್ತು ಖರೀದಿಸಿ ಬಳಸುವವರ ಸಂಖ್ಯೆಯೂ ಕಡಿಮೆಯೇನಿಲ್ಲ!. 

ಅದೇನೇ ಇರಲಿ, ಇನ್ನುಮುಂದಾದರೂ ನೀವು ಬಳಸುತ್ತಿರುವ ಸೌಂದರ್ಯ ವರ್ಧಕಗಳಲ್ಲಿನ ರಾಸಾಯನಿಕ ದ್ರವ್ಯಗಳ ಬಗ್ಗೆ ಅರಿತುಕೊಳ್ಳದೆ, ಇವುಗಳನ್ನು ಬಳಸದಿರಿ. ನಿಮ್ಮ ಪೂರ್ವಜರು ಬಳಸುತ್ತಿದ್ದ ನೈಸರ್ಗಿಕ ಸೌಂದರ್ಯ ಪ್ರಸಾದನಗಳನ್ನು ಬಳಸುವ ಮೂಲಕ ನಿಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಿರಿ. 

ಡಾ. ಸಿ. ನಿತ್ಯಾನಂದ ಪೈ,ಪುತ್ತೂರು 

Muttu mundooduva matregalu!

                                   ಮುಟ್ಟು ಮುಂದೂಡುವ ಮಾತ್ರೆಗಳು!

ಅವಿಭಕ್ತ ಹಿಂದೂ ಕುಟುಂಬವೊಂದರ ಸೊಸೆಯಾಗಿರುವ ಸುಮತಿಗೆ, ಇತ್ತೀಚಿನ ಕೆಲದಿನಗಳಿಂದ ಅತಿಆಯಾಸ,ತಲೆತಿರುಗುವಿಕೆ,ತಲೆನೋವುಗಳೊಂದಿಗೆ ಅನಿಯಮಿತ  ರಜೋಸ್ರಾವದ ತೊಂದರೆಗಳು ಬಾಧಿಸಲು ಆರಂಭಿಸಿದ್ದವು. ಇದರೊಂದಿಗೆ ಆಕೆಯ ಶರೀರದ ಗಾತ್ರವೂ ಸಾಕಷ್ಟು ಹೆಚ್ಚಿದ್ದರಿಂದ, ತನ್ನ ಧಡೂತಿ ದೇಹವೇ ಈ ಸಮಸ್ಯೆಗಳಿಗೆ ಕಾರಣವೆಂದು ಭಾವಿಸಿದ್ದಳು. 

ಒಂದಿಷ್ಟು ಪಥ್ಯ ಹಾಗೂ ದೈನಂದಿನ ವ್ಯಾಯಾಮ- ನಡಿಗೆಗಳಿಂದ ಸಮಸ್ಯೆ ಪರಿಹಾರಗೊಳ್ಳದ ಕಾರಣದಿಂದಾಗಿ, ಅನ್ಯಮಾರ್ಗವಿಲ್ಲದೆ ಸುಮತಿಯು ಪರಿಚಿತ ವೈದ್ಯರಲ್ಲಿ ತೆರಳಿದ್ದಳು. ಆಕೆಯ ಸಮಸ್ಯೆಗಳನ್ನು ಕೇಳಿ ತಿಳಿದುಕೊಂಡ ವೈದ್ಯರು, ಶಾರೀರಿಕ ತಪಾಸಣೆಯನ್ನು ಮಾಡಿದಾಗ ಆಕೆಯ ರಕ್ತದೊತ್ತಡವು ಹೆಚ್ಚಿರುವುದು ಪತ್ತೆಯಾಗಿತ್ತು. ಆಕೆಯ ತೊಂದರೆಗಳಿಗೆ ಮೂಲಕಾರಣ ಎನಿಸಿದ್ದ ಅಧಿಕ ರಕ್ತದೊತ್ತಡ ಮತ್ತು ಸ್ಥೂಲಕಾಯಗಳು ಅನುವಂಶಿಕವಾಗಿ ಬಂದಿಲ್ಲವೆನ್ನುವುದನ್ನು ಖಾತರಿ ಪಡಿಸಿಕೊಂಡ ವೈದ್ಯರು, ಈ ಬಗ್ಗೆ ಇನ್ನಷ್ಟು ಪ್ರಶ್ನೆಗಳನ್ನು ಕೇಳಿದ್ದರು. ಇದರಿಂದಾಗಿ ಸುಮತಿಯು ಕಳೆದ 20 ವರ್ಷಗಳಿಂದ ತನಗೆ ಬೇಕೆನಿಸಿದಾಗಲೆಲ್ಲ, "ಮುಟ್ಟು ಮುಂದೂಡುವ ಮಾತ್ರೆ" ಗಳನ್ನು ಸೇವಿಸುತ್ತಿದ್ದುದು ತಿಳಿದುಬಂದಿತ್ತು. ವೈದ್ಯರ ಅಭಿಪ್ರಾಯದಂತೆ ಅನಿಯಮಿತವಾಗಿ ಹಾಗೂ ಅತಿಯಾಗಿ ಆಕೆಯು ಸೇವಿಸುತ್ತಿದ್ದ ಈ ಮಾತ್ರೆಗಳೇ ಆಕೆಯ ಸಮಸ್ಯೆಗಳಿಗೆ ಕಾರಣವೆನಿಸಿದ್ದವು. ವಿಶೇಷವೆಂದರೆ ಸುಮತಿಗೆ ಇಂತಹ ಮಾತ್ರೆಗಳನ್ನು ಗರ್ಭಧಾರಣೆಯನ್ನು ತಡೆಯಲು ಬಳಸುವ ಬಗ್ಗೆ ಹಾಗೂ ಈ ಹಾರ್ಮೋನ್ ಮಾತ್ರೆಗಳ ದೀರ್ಘಕಾಲೀನ ಸೇವನೆಯ ದುಷ್ಪರಿಣಾಮಗಳ ಬಗ್ಗೆ ಏನೇನೂ ತಿಳಿದಿರಲಿಲ್ಲ. ಸುಮಾರು 20 ವರ್ಷಗಳ ಹಿಂದೆ ಆಕೆಯ ವಿವಾಹದ ಸಂದರ್ಭದಲ್ಲಿ ,ಮುಟ್ಟು ಮುಂದೂಡುವ ಸಲುವಾಗಿ ಪರಿಚಿತ ವೈದ್ಯರು ಸೂಚಿಸಿದ್ದ ಮಾತ್ರೆಗಳನ್ನು, ಆಕೆಯು ಹಲವಾರು ವರ್ಷಗಳಿಂದ ಔಷದ ಅಂಗಡಿಗಳಿಂದ ಖರೀದಿಸಿ, ತನಗೆ ಬೇಕೆನಿಸಿದಾಗ ಬಳಸುತ್ತಿದ್ದಳು!. 

ಸುಮತಿಯು ಈ ಮಾತ್ರೆಗಳನ್ನು ಪದೇಪದೇ ಬಳಸುತ್ತಿರಲು ನಿರ್ದಿಷ್ಟ ಕಾರಣಗಳೂ ಇದ್ದವು. ಸಂಪ್ರದಾಯಸ್ಥ ಹಿಂದೂ ಕುಟುಂಬದ ಹಿರಿಯ ಸೋಸೆಯಾಗಿದ್ದ ಆಕೆಯು, ಮನೆಯ ಯಜಮಾನಿಯ ಕರ್ತವ್ಯವನ್ನೂ ನಿಭಾಯಿಸಬೇಕಾಗಿತ್ತು. ಪ್ರತಿನಿತ್ಯ ದೇವರ ಪೂಜೆ ನಡೆಯುವ ಈ ಮನೆಯಲ್ಲಿ, ಮುಟ್ಟಾದ ಹೆಂಗಸರು ಕಡ್ಡಾಯವಾಗಿ ಹೊರಗೆ ಕೂರಬೇಕಿತ್ತು. ಜೊತೆಗೆ ಇಲ್ಲಿ ನಡೆಯುತ್ತಿದ್ದ ಶುಭ- ದೇವತಾ ಕಾರ್ಯಗಳು ಮತ್ತು ಇತರ ಧಾರ್ಮಿಕ ಆಚರಣೆಗಳಿಗೆ ಇತಿಮಿತಿಗಳೇ ಇರಲಿಲ್ಲ. ಇವೆಲ್ಲ ಕಾರಣಗಳಿಂದಾಗಿ ಇಂತಹ ಸಂದರ್ಭಗಳಲ್ಲಿ ಹೊರಗೆ ಕೂರಲು ಬಯಸದ ಸುಮತಿಯು,ಮುಟ್ಟು ಮುಂದೂಡುವ ಮಾತ್ರೆಗಳ ಮೊರೆಹೊಗುತ್ತಿದ್ದಳು. ಈ ರೀತಿಯಲ್ಲಿ ಸುದೀರ್ಘಕಾಲ ಆಕೆ ಸೇವಿಸಿದ್ದ ಹಾರ್ಮೋನ್ ಮಾತ್ರೆಗಳು, ಅಂತಿಮವಾಗಿ ಆಕೆಯ ಆರೋಗ್ಯವನ್ನು ಹದಗೆಡಿಸಲು ಯಶಸ್ವಿಯಾಗಿದ್ದವು. 

ಅಜ್ಞಾನದಿಂದ ಅನಾರೋಗ್ಯ 

ಬಹುತೇಕ ಭಾರತೀಯ ನಾರಿಯರು ತಮ್ಮ ಅವಶ್ಯಕತೆಗಳಿಗೆ ಅನುಗುಣವಾಗಿ " ಮುಟ್ಟು ಮುಂದೂಡುವ ಮಾತ್ರೆ"ಗಳನ್ನು ಸೇವಿಸುತ್ತಾರೆ. ನಮ್ಮ ಪೂರ್ವಜರು ಕಟ್ಟುನಿಟ್ಟಾಗಿ ಪರಿಪಾಲಿಸುತ್ತಿದ್ದ ಅನೇಕ ಮೂಢನಂಬಿಕೆಗಳನ್ನು, ಈ ವೈಜ್ಞಾನಿಕ ಯುಗದಲ್ಲೂ  ಮುಂದುವರೆಸಿರುವುದು ಇದಕ್ಕೊಂದು ಪ್ರಮುಖ ಕಾರಣ ಎಂದಲ್ಲಿ ತಪ್ಪೆನಿಸಲಾರದು. 

ಹಿಂದಿನ ಕಾಲದಲ್ಲಿ ಅನೇಕ ಸಂಪ್ರದಾಯಸ್ಥ ಕುಟುಂಬಗಳಲ್ಲಿ ಮೈನೆರೆದ ಬಾಲಕಿಯರಿಂದ ಆರಂಭಿಸಿ, ಮಹಿಳೆಯರಲ್ಲಿ ಋತುಬಂಧವಾಗುವ ತನಕ ರಜೋಸ್ರಾವದ ದಿನಗಳಲ್ಲಿ ತಮ್ಮ ವಾಸ್ತವ್ಯದ ಮನೆಯನ್ನೇ ಪ್ರವೇಶಿಸುವಂತಿರಲಿಲ್ಲ. ಮುಟ್ಟಾದ ದಿನಗಳಲ್ಲಿ ಹೆಣ್ಣು "ಅಪವಿತ್ರಳು" ಎನ್ನುವ ಮೂಢನಂಬಿಕೆಯೇ ಇಂತಹ ಆಚಾರ-ವಿಚಾರಗಳಿಗೆ ಮೂಲ ಕಾರಣವೆನಿಸಿತ್ತು. ಇದೇ ಕಾರಣದಿಂದಾಗಿ ಹಬ್ಬಹರಿದಿನಗಳು ಮತ್ತು ಶುಭಕಾರ್ಯಗಳಲ್ಲಿ ರಜಸ್ವಲೆಯಾದವರು ಭಾಗವಹಿಸುವಂತಿರಲಿಲ್ಲ. ತತ್ಪರಿಣಾಮವಾಗಿ ಇಂತಹ ಸಂದರ್ಭಗಲ್ಲಿ ಹೊರಗೆ ಉಳಿಯಲು ಬಯಸದ ಮಹಿಳೆಯರು,ಗುಟ್ಟಿನಲ್ಲಿ ಮುಟ್ಟು ಮುಂದೂಡುವ ಮಾತ್ರೆಗಳನ್ನು ಸೇವಿಸುವ ಮೂಲಕ ತಮ್ಮ "ಪಾವಿತ್ರ್ಯ"ವನ್ನು ಕಾಪಾಡಿಕೊಳ್ಳುತ್ತಿದ್ದರು!. 

ಸಾಮಾನ್ಯವಾಗಿ ಅನೇಕ ವಿದ್ಯಾವಂತ ಮಹಿಳೆಯರಿಗೂ ಇಂತಹ ಮಾತ್ರೆಗಳಲ್ಲಿ ಇರುವ ಔಷದ, ಸೇವನಾ ಕ್ರಮ, ಸೇವನೆಯ ಉದ್ದೇಶ, ಇವುಗಳ ಸೇವನೆಯಿಂದ ಉದ್ಭವಿಸಬಲ್ಲ ಅಡ್ಡ-ದುಷ್ಪರಿಣಾಮಗಳ ಬಗ್ಗೆ ಅವಶ್ಯಕ ಮಾಹಿತಿ ತಿಳಿದಿರುವುದಿಲ್ಲ. ಈ ಮಾತ್ರೆಗಳನ್ನು ಸಾಮಾನ್ಯವಾಗಿ ಗರ್ಭಧಾರಣೆಯನ್ನು ತಡೆಯಲು ಬಳಸುತ್ತಾರೆನ್ನುವ ಅರಿವೂ ಇಲ್ಲ. ಇಂತಹ ಅಜ್ಞಾನದಿಂದಾಗಿ ಅನೇಕ ಮಹಿಳೆಯರು ಹಬ್ಬಹರಿದಿನಗಳು ಮತ್ತು  ಪೂಜೆ ಪುನಸ್ಕಾರಗಳ ಸರಮಾಲೆ ಅಂತ್ಯಗೊಳ್ಳುವ ತನಕ ಸೇವಿಸುತ್ತಾರೆ. ಈ ರೀತಿಯಲ್ಲಿ ತಮಗೆ ಬೇಕೆನಿಸಿದಾಗ ಮಾತ್ರೆಗಳನ್ನು ಸೇವಿಸುವ ಮೂಲಕ, ತಮ್ಮ ರಜೋಸ್ರಾವದ ಸ್ವಾಭಾವಿಕ ವೃತ್ತವನ್ನು ತಮಗೆ ಬೇಕಾದಂತೆ ಬದಲಾಯಿಸಿಕೊಳ್ಳುತ್ತಾರೆ!. ಈ ಪ್ರವೃತ್ತಿಯನ್ನು ಹಲವಾರು ವರ್ಷಗಳ ಕಾಲ ಪರಿಪಾಲಿಸಿದಲ್ಲಿ, ಅನೇಕ ವಿಧದ ಆರೋಗ್ಯದ ಸಮಸ್ಯೆಗಳಿಗೆ ಈಡಾಗುತ್ತಾರೆ. 

ಅನುಭವೀ ವೈದ್ಯರ ಅಭಿಪ್ರಾಯದಂತೆ ಅತ್ಯಲ್ಪ ಪ್ರಮಾಣದ ಮಹಿಳೆಯರು ಇಂತಹ ಔಷದಗಳನ್ನು ಸೇವಿಸುವ ಮುನ್ನ ವೈದ್ಯರ ಸಲಹೆ ಪಡೆಯುತ್ತಾರೆ. ಆದರೆ ಒಂದು ಬಾರಿ ವೈದ್ಯರು ಇದನ್ನು ಸೂಚಿಸಿದ ಬಳಿಕ, ಹಲವಾರು ವರ್ಷಗಳ ಕಾಲ ಇವುಗಳನ್ನು ಬಳಸುತ್ತಲೇ ಇರುತ್ತಾರೆ. 

ಮಾತ್ರೆಗಳಲ್ಲಿ ಏನಿದೆ?

ಸಾಮಾನ್ಯವಾಗಿ ಮುಟ್ಟನ್ನು ಮುಂದೂಡಲು ಬಳಸುವ ಮಾತ್ರೆಗಳಲ್ಲಿ ಪ್ರೊಜೆಸ್ಟೆರಾನ್  ಅಥವಾ ಈಸ್ಟ್ರೋಜೆನ್  ಮತ್ತು ಪ್ರೊಜೆಸ್ಟೆರಾನ್ ಎನ್ನುವ ಹಾರ್ಮೋನ್ ಗಳ ಸಮ್ಮಿಶ್ರಣವಿದ್ದು, ಇವುಗಳನ್ನು ಗರ್ಭನಿರೋಧಕ ಮತ್ತು ಇತರ ಕೆಲವು ಉದ್ದೇಶಗಳಿಗಾಗಿ ಬಳಸಲಾಗುತ್ತದೆ. ಈ ಮಾತ್ರೆಗಳನ್ನು ರಜೋಸ್ರಾವದ ಐದನೆಯ ದಿನದಿಂದ ಆರಂಭಿಸಿ, 25 ದಿನಗಳ ಕಾಲ ಪ್ರತಿನಿತ್ಯ ತಪ್ಪದೆ ಸೇವಿಸಿದಲ್ಲಿ, ಸ್ತ್ರೀಯರ ಅಂಡಾಶಯಗಳಿಂದ ಅಂಡಾಣುವಿನ  ಬಿಡುಗಡೆಯನ್ನು ತಡೆಗಟ್ಟುತ್ತದೆ. ಈ ಮಾತ್ರೆಗಳ ಕ್ರಮಬದ್ಧ ಸೇವನೆಯಿಂದ ಗರ್ಭಧಾರಣೆಯನ್ನು ತಡೆಗಟ್ಟಬಹುದಾಗಿದೆ. 25 ದಿನಗಳ ಬಳಿಕ ಮಾತ್ರೆಯ ಸೇವನೆಯನ್ನು ನಿಲ್ಲಿಸಿದ ಕೆಲದಿನಗಳಲ್ಲಿ ರಜೋಸ್ರಾವವಾಗುತ್ತದೆ. 

ಸ್ತ್ರೀಯರ ಶರೀರದಲ್ಲಿ ಸ್ವಾಭಾವಿಕವಾಗಿ ಉತ್ಪನ್ನವಾಗುವ ಹಾರ್ಮೋನ್ ಗಳ ಪ್ರಮಾಣ,ಇವರ ವಯಸ್ಸು, ಶಾರೀರಿಕ ಮತ್ತು ಮಾನಸಿಕ ಆರೋಗ್ಯಗಳ ಸ್ಥಿತಿಗತಿಗಳಿಗೆ ಅನುಗುಣವಾಗಿ, ಋತುಚಕ್ರದಲ್ಲಿ ತುಸು ವ್ಯತ್ಯಯವಾಗಬಹುದು. ಸಾಮಾನ್ಯವಾಗಿ ಋತುಚಕ್ರದ ಅಂತ್ಯದಲ್ಲಿ ಈ ಹಾರ್ಮೋನ್ ಗಳ ಪ್ರಮಾಣವು ಕಡಿಮೆಯಾದಾಗ ರಜೋಸ್ರಾವ ಸಂಭವಿಸುತ್ತದೆ. ಆದರೆ ಮುಟ್ಟನ್ನು ಮುಂದೂಡಲು ಋತುಚಕ್ರದ ಮಧ್ಯೆ ಅಥವಾ ಅಂತ್ಯದಲ್ಲಿ ಈ ಮಾತ್ರೆಗಳನ್ನು ಸೇವಿಸುವುದರಿಂದ, ಶರೀರದಲ್ಲಿ ಹಾರ್ಮೋನ್ ಗಳ ಪ್ರಮಾಣವು ಕೃತಕ ರೀತಿಯಲ್ಲಿ ಹೆಚ್ಚಾಗುವುದರಿಂದ ರಜೋಸ್ರಾವ ಮುಂದೂಡಲ್ಪಡುತ್ತದೆ. 

ಆದರೆ ತಮ್ಮ ನಿರೀಕ್ಷಿತ ರಜೋಸ್ರಾವದ ದಿನಗಳಲ್ಲಿ ನಡೆಯಲಿರುವ ವಿಶೇಷ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲು ಬಯಸುವ ಮಹಿಳೆಯರು  ಕೆಲವಾರು ದಿನಗಳ ಕಾಲ ಈ ಮಾತ್ರೆಗಳನ್ನು ಸೇವಿಸಿ, ನಿಗದಿತ ಕಾರ್ಯಕ್ರಮ ಮುಗಿದೊಡನೆ ಇವುಗಳ ಸೇವನೆಯನ್ನು ನಿಲ್ಲಿಸಿಬಿಡುತ್ತಾರೆ. ಇನ್ನು ಕೆಲವರಂತೂ ಹಬ್ಬಹರಿದಿನಗಳ ಸಲುವಾಗಿ ಒಂದೆರಡು ತಿಂಗಳುಗಳ ಕಾಲ ನಿರಂತರವಾಗಿ ಈ ಮಾತ್ರೆಗಳನ್ನು ಸೇವಿಸುತ್ತಾರೆ. ಆದರೆ ಈ ರೀತಿಯಲ್ಲಿ ಸೇವಿಸುತ್ತಿದ್ದ ಮಾತ್ರೆಗಳನ್ನು ನಿಲ್ಲಿಸಿದೊಡನೆ ಕೆಲವರಲ್ಲಿ ಅತಿಯಾದ ರಜೋಸ್ರಾವ ಮತ್ತಿತರ ಸಮಸ್ಯೆಗಳು ಕಂಡುಬರುತ್ತವೆ. 

ಮುಂಜಾಗರೂಕತೆ 

ಗರ್ಭಧಾರಣೆಯನ್ನು ತಡೆಯುವ ಸಲುವಾಗಿ ಅಥವಾ ಮುಟ್ಟನ್ನು ಮುಂದೂಡುವ ಸಲುವಾಗಿ ಮಾತ್ರೆಗಳನ್ನು ಸೂಚಿಸುವ ಮುನ್ನ, ವೈದ್ಯರು ಸ್ತ್ರೀಯರ ಶಾರೀರಿಕ ಹಾಗೂ ಮಾನಸಿಕ ಆರೋಗ್ಯಗಳನ್ನು ಗಮನಿಸಿ ಅವಶ್ಯಕತೆ ಇದ್ದಲ್ಲಿ ಶಾರೀರಿಕ ಮತ್ತು ಇತರ ಕೆಲಪರೀಕ್ಷೆಗಳನ್ನು ನಡೆಸುತ್ತಾರೆ. ಏಕೆಂದರೆ ಇಂತಹ ಔಷದಗಳನ್ನು ಯಕೃತ್,ಹೃದಯ-ರಕ್ತನಾಳಗಳ,ಮೂತ್ರಪಿಂಡ ಸಂಬಂಧಿತ ವ್ಯಾಧಿಪೀಡಿತರು, ಅಧಿಕ ರಕ್ತದೊತ್ತಡ, ಮಧುಮೇಹ,ಅಪಸ್ಮಾರ, ಆಸ್ತಮ, ಖಿನ್ನತೆ,ಮೈಗ್ರೇನ್ ಕಾಯಿಲೆಗಳಿಂದ ಬಳಲುತ್ತಿರುವವರಿಗೆ ನೀಡುವಂತಿಲ್ಲ. ಇದಲ್ಲದೆ ಗರ್ಭಿಣಿಯರು,ಮಗುವಿಗೆ ಮೊಲೆಯೂಡಿಸುವ ಮಾತೆಯರು,ಕೆಲವಿಧದ ಸ್ತನ ಕ್ಯಾನ್ಸರ್ ಪೀಡಿತರು,ಕಾರಣವರಿಯದ ಯೋನಿಜನ್ಯ ರಕ್ತಸ್ರಾವ, ಥ್ರಾಂಬೊ ಫ್ಲೆಬೈಟಿಸ್ , ಥ್ರಾಂಬೊ ಎಂಬೋಲಿಕ್ ಸಮಸ್ಯಾ ಪೀಡಿತರು ಮತ್ತು ಕೆಲವೊಂದು ನಿರ್ದಿಷ್ಟ ತೊಂದರೆಗಳಿಂದ ಬಳಲುತ್ತಿರುವವರು ಇಂತಹ ಮಾತ್ರೆಗಳನ್ನು ಸೇವಿಸಬಾರದು. ಆದುದರಿಂದ ಇಂತಹ ಸಮಸ್ಯಾ ಪೀಡಿತರಿಗೆ ವೈದ್ಯರು ಈ ಮಾತ್ರೆಗಳನ್ನು ಸೂಚಿಸುವುದಿಲ್ಲ. ಆದರೆ ಈ ಪ್ರಮುಖ ಮಾಹಿತಿಯನ್ನು ಅರಿತಿರದ ಮಹಿಳೆಯರು,ಔಷದ ಅಂಗಡಿಗಳಿಂದ ಇವುಗಳನ್ನು  ಖರೀದಿಸಿ ಸೇವಿಸುವ ಹವ್ಯಾಸವು  ಇಂದಿಗೂ ನಿಂತಿಲ್ಲ!. 

ಈ ಔಷದವನ್ನು ಸೇವಿಸುವ ಸ್ತ್ರೀಯರಲ್ಲಿ ಸಾಮಾನ್ಯವಾಗಿ ಹಸಿವಿಲ್ಲದಿರುವುದು,ವಾಕರಿಕೆ-ವಾಂತಿ, ಸುಸ್ತು ಮತ್ತು ಸಂಕಟಗಳಂತಹ ಸೌಮ್ಯ ರೂಪದ ತೊಂದರೆಗಳು ಬಾಧಿಸುವ ಸಾಧ್ಯತೆಗಳು ಇರುವುದರಿಂದ, ರಾತ್ರಿ ಊಟದ ಬಳಿಕ ಸೇವಿಸುವಂತೆ ವೈದ್ಯರು ಹೇಳುತ್ತಾರೆ. 

ಗಂಭೀರ ಸಮಸ್ಯೆಗಳು 

ಈ ಮಾತ್ರೆಗಳನ್ನು ಸುದೀರ್ಘಕಾಲ ಸೇವಿಸುವುದರಿಂದ ಕೆಲವೊಂದು ಗಂಭೀರ ಆರೋಗ್ಯದ ಸಮಸ್ಯೆಗಳು ತಲೆದೋರುವ ಸಾಧ್ಯತೆಗಳಿವೆ. ಇವುಗಳಲ್ಲಿ ಸ್ತನಗಳು ತುಂಬಿ ಬಿಗಿದಂತಹ ಸಂವೇದನೆ ಅಥವಾ ನೋವು, ಚರ್ಮದ ಮೇಲೆ ದಡಿಕೆಗಳು ಮೂಡಿ ತುರಿಸುವುದು, ಯೋನಿಸ್ರಾವದಲ್ಲಿ ಹೆಚ್ಚಳ,ಮೊಲೆಹಾಲು ಕಡಿಮೆಯಾಗುವುದು,ಸ್ತನಗಳಲ್ಲಿ ಗಂಟುಗಳು ಉದ್ಭವಿಸುವುದು, ಕಣ್ಣು ಕತ್ತಲಾವರಿಸಿದಂತೆ- ಪ್ರಜ್ಞೆ ತಪ್ಪಿದಂತೆ ಆಗುವುದು,ಎದುಬ್ಬಸ, ಅತಿ ಆಯಾಸ,ಉಸಿರಾಡಲು- ಮಾತನಾಡಲು ಹಾಗೂ ನುಂಗಲು ಕಷ್ಟವೆನಿಸುವುದು,ಕೈಕಾಲುಗಳಲ್ಲಿ ಸ್ಪರ್ಶಜ್ಞಾನವಿಲ್ಲದಂತಾಗುವುದು, ಹೃದಯ ಬಡಿತ ಹೆಚ್ಚಾಗುವುದು, ಎದೆನೋವು, ದೃಷ್ಟಿ ಮಸುಕಾಗುವುದು,ಅಪಸ್ಮಾರದಂತಹ ಸೆಳೆತಗಳು ಬಾಧಿಸುವುದು, ಕಾಲುಗಳಲ್ಲಿ ಬಾವು ಹಾಗೂ ನೋವು, ಕೈ,ಕಾಲು,ಮುಖ,ಕಣ್ಣು ಮತ್ತು ನಾಲಿಗೆಗಳು ಊದಿಕೊಳ್ಳುವುದು, ಅನಿರೀಕ್ಷಿತವಾಗಿ ಯೋನಿಯಿಂದ ರಕ್ತಸ್ರಾವ, ಶರೀರದಲ್ಲಿ ನೀರಿನಂಶ ಸಂಗ್ರಹಗೊಂಡು ತೂಕ ಮತ್ತು ರಕ್ತದೊತ್ತಡ ಹೆಚ್ಚುವುದು, ಯಕೃತ್ತಿನ ತೊಂದರೆಗಳು ಮತ್ತು ಮಾನಸಿಕ ಖಿನ್ನತೆಗಳಂತಹ ಅನೇಕ ಆರೋಗ್ಯದ ಸಮಸ್ಯೆಗಳು ಪ್ರಮುಖವಾಗಿವೆ. 

ಇವೆಲ್ಲಕ್ಕೂ ಮಿಗಿಲಾಗಿ ಈ ಮಾತ್ರೆಗಳ ಅಡ್ಡ ಪರಿಣಾಮದಿಂದಾಗಿ ಉದ್ಭವಿಸಬಲ್ಲ, ಹೆಪ್ಪುಗಟ್ಟಿದ ರಕ್ತದ ತುಣುಕುಗಳಿಂದಾಗಿ ಹೃದಯ- ರಕ್ತನಾಳಗಳು,ಮೆದುಳು ಹಾಗೂ  ಶ್ವಾಸಕೋಶಗಳಿಗೆ ಸಂಬಂಧಿಸಿದ (ಥ್ರಾಂಬೋಸಿಸ್ ಮತ್ತು ಎಂಬೊಲಿಸಂ) ಗಂಭೀರ ಸಮಸ್ಯೆಗಳು ತಲೆದೋರುವ ಸಾಧ್ಯತೆಗಳಿವೆ. ಇದೇ ಕಾರಣದಿಂದಾಗಿ ಥ್ರಾಂಬೊ ಫ್ಲೆಬೈಟಿಸ್, ಡೀಪ್ ವೇಯ್ನ್ ಥ್ರಾಂಬೋಸಿಸ್ ಹಾಗೂ ಎಂಬೋಲಿಕ್ ತೊಂದರೆಗಳಿಂದ ಪೀಡಿತರಿಗೆ ಈ ಔಷದವನ್ನು ವೈದ್ಯರು ನೀಡುವುದಿಲ್ಲ. 

ಗರ್ಭಧಾರಣೆಯನ್ನು ತಡೆಗಟ್ಟುವ ಸಲುವಾಗಿ ಸುದೀರ್ಘಕಾಲ ಈ ಮಾತ್ರೆಗಳನ್ನು ಸೇವಿಸಲು ಸೂಚಿಸುವ ಮುನ್ನ ಮೇಲೆ ವಿವರಿಸಿದ ಕಾಯಿಲೆಗಳನ್ನು ಗಮನದಲ್ಲಿರಿಸಿ, ಸ್ತ್ರೀಯರನ್ನು ಪರೀಕ್ಷಿಸಿದ ಬಳಿಕವೇ ವೈದ್ಯರು ಹಸಿರು ನಿಶಾನೆಯನ್ನು ತೋರಿಸುತ್ತಾರೆ. ಈ ಸಂದರ್ಭದಲ್ಲಿ ಸ್ತ್ರೀಯರ ಹಿಂದಿನ ವೈದ್ಯಕೀಯ ವಿವರಗಳು ಹಾಗೂ ಈ ಔಷದವನ್ನು ಸೇವಿಸಬಾರದಂತಹ ಆರೋಗ್ಯದ ಸಮಸ್ಯೆಗಳು ಇಲ್ಲದಿರುವುದನ್ನು ಖಚಿತಪಡಿಸಿಕೊಳ್ಳುತ್ತಾರೆ. ಜೊತೆಗೆ ಈ ಮಾತ್ರೆಗಳನ್ನು ಸೇವಿಸುತ್ತಿರುವಷ್ಟು ಸಮಯ, ನಿಯಮಿತವಾಗಿ ಆರೋಗ್ಯದ ತಪಾಸಣೆಯನ್ನು ಮಾಡಿಸಿಕೊಳ್ಳಲು ಸಲಹೆಯನ್ನು ನೀಡುತ್ತಾರೆ. 

ಪ್ರಸ್ತುತ ಇವೆಲ್ಲಾ ಮಾಹಿತಿಗಳನ್ನು ಅರಿತುಕೊಂಡ ಬಳಿಕವೂ, ಇಂತಹ ಸಮಸ್ಯೆಗಳಿಗೆ ಕಾರಣವೆನಿಸಬಲ್ಲ ಈ ಹಾರ್ಮೋನ್ ಮಾತ್ರೆಗಳನ್ನು ನಿಮಗೆ ಬೇಕೆನಿಸಿದಾಗ ಸೇವಿಸುವುದು, ಅಪಾಯಕ್ಕೆ ಆಹ್ವಾನವನ್ನು ನೀಡಿದಂತೆ ಎನ್ನುವುದನ್ನು ಮರೆಯದಿರಿ. 

ಡಾ. ಸಿ. ನಿತ್ಯಾನಂದ ಪೈ, ಪುತ್ತೂರು  

Alumium vessels-are they safe?

 ಅಲ್ಯುಮಿನಿಯಂ ಪಾತ್ರೆಗಳಬಳಕೆ

ಅನಾರೋಗ್ಯಕರವೇ?

ಭೂಮಿಯ ಮೇಲೆ ಓಡಾಡುವ ಮೋಟಾರು ವಾಹನಗಳಿಂದ ಹಿಡಿದು ಆಗಸದಲ್ಲಿ ಹಾರಾಡುವ ವಿಮಾನಗಳ ನಿರ್ಮಾಣದಲ್ಲೂ ವ್ಯಾಪಕವಾಗಿ ಬಳಸಲ್ಪಡುವ ಅಲ್ಯುಮಿನಿಯಂ ಲೋಹವು, ಬಹುತೇಕ ಭಾರತೀಯರ ದೈನಂದಿನ ಜೀವನದ ಅವಿಭಾಜ್ಯ ಅಂಗವೆನಿಸಿದೆ. ಏಕೆಂದರೆ ಬಡತನದ ರೇಖೆಗಿಂತ ಕೆಳಗಿರುವ ಅಧಿಕತಮ ಭಾರತೀಯರು, ದಿನನಿತ್ಯ ಬಳಸುವ ಪಾತ್ರೆಪಗಡಿಗಳಲ್ಲಿ ಅಲ್ಯುಮಿನಿಯಂ ಪಾತ್ರೆಗಳಿಗೆ ಅಗ್ರ ಸ್ಥಾನ ಸಲ್ಲುತ್ತದೆ. 

ಅತ್ಯಂತ ಹಗುರವಾದ,ನೋಡಲು ಆಕರ್ಷಕವೆನಿಸುವ ಹಾಗೂ ಇತರ ಲೋಹಗಳೊಂದಿಗೆ ಹೋಲಿಸಿದಾಗ ಸಾಕಷ್ಟು ಅಗ್ಗವೆನಿಸುವ ಮತ್ತು ಹಳೆಯದಾದರೂ ಮತ್ತೆ ಮಾರಾಟ ಮಾಡಬಹುದಾದ ಅಲ್ಯುಮಿನಿಯಂ, ಜಗತ್ತಿನಾದ್ಯಂತ ಇನ್ನಿತರ ಉದ್ದೇಶಗಳಿಗೂ ಬಳಸಲ್ಪಡುತ್ತಿದೆ. ಆದರೆ ಭಾರತದ ಬಹುತೇಕ ಬಡವರು ತಮ್ಮ ಮೂರುಹೊತ್ತಿನ ತುತ್ತನ್ನು ಬೇಯಿಸಲು ಅನಿವಾರ್ಯವಾಗಿ ಬಳಸುವ ಅಲ್ಯುಮಿನಿಯಂ ಪಾತ್ರೆಗಳ ಬಳಕೆಯಿಂದ ಉದ್ಭವಿಸಬಲ್ಲ ಆರೋಗ್ಯದ ಸಮಸ್ಯೆಗಳ ಸಂಕ್ಷಿಪ್ತ ವಿವರಗಳು ಇಲ್ಲಿವೆ. 

ಅಲ್ಜೀಮರ್ಸ್ ಕಾಯಿಲೆಗೆ ಕಾರಣ?

ಇಂಗ್ಲೆಂಡ್ ನ ಕಾರ್ನವಾಲ್  ಪ್ರದೇಶದ ವ್ಯಾಪ್ತಿಯಲ್ಲಿರುವ ಕ್ಯಾಮಲ್ ಫೋರ್ಡ್ ಹಳ್ಳಿಯ ನಿವಾಸಿಯಾಗಿದ್ದ ಕರೋಲ್ ಕ್ರಾಸ್ ಎನ್ನುವ ಮಹಿಳೆಯು 2004 ರಲ್ಲಿ ಅಲ್ಜೀಮರ್ಸ್ ಕಾಯಿಲೆಯಿಂದ ಮೃತಪಟ್ಟಿದ್ದಳು. ಈಕೆಯ ಮರಣಕ್ಕೆ ಸುಮಾರು 16 ವರ್ಷಗಳ ಹಿಂದೆ ಸಂಭವಿಸಿದ್ದ 'ರಾಸಾಯನಿಕ ದುರಂತ" ದ ಪರಿಣಾಮವಾಗಿ, ಕುಡಿಯುವ ನೀರಿನ ಮೂಲವು ಅಲ್ಯುಮಿನಿಯಂ ನಿಂದ ಕಲುಷಿತವಾಗಿದ್ದುದೇ ಕಾರಣವೆನಿಸಿತ್ತು. ಮರಣೋತ್ತರ ಪರೀಕ್ಷೆಯಿಂದ ತಿಳಿದುಬಂದಂತೆ ಆಕೆಯ ಮೆದುಳಿನ ಟಿಶ್ಯೂ ಗಳಲ್ಲಿ ಅತ್ಯಧಿಕ ಪ್ರಮಾಣದ ಅಲ್ಯುಮಿನಿಯಂ ನ ಅಂಶಗಳು ಪತ್ತೆಯಾಗಿದ್ದವು. ಕ್ರಿಸ್ಟೋಫಾರ್ ಎಕ್ಸ್ ಲೀ ಎನ್ನುವ ಕೆಮಿಸ್ಟ್ ಮತ್ತು ಮಾರ್ಗರೆಟ್ ಎಸಿರಿ ಎನ್ನುವ ನ್ಯೂರಾಲಜಿಸ್ಟ್ ಇವರ ತಂಡವು, ಈ ಅಂಶವನ್ನು ಪತ್ತೆಹಚ್ಚಿದ ಬಳಿಕ ಈ ಬಗ್ಗೆ ಇನ್ನಷ್ಟು ಅಧ್ಯಯನಗಳನ್ನು ನಡೆಸಿದ್ದರು. 

ಕರೋಲ್ ಕ್ರಾಸ್ ಳ ಮರಣಕ್ಕೆ ಅಪರೂಪದಲ್ಲಿ ಕಾಣಸಿಗುವ ಒಂದು ವಿಧದ ಅಲ್ಜೀಮರ್ಸ್ ಕಾಯಿಲೆಯೇ ಕಾರಣವಾಗಿತ್ತು. ಸಾಮಾನ್ಯವಾಗಿ ಅಲ್ಜೀಮರ್ಸ್ ಕಾಯಿಲೆಯು 70 ರಿಂದ 80 ವರ್ಷದ ವೃದ್ಧರನ್ನು ಪೀಡಿಸುವುದಾದರೂ, ಕ್ರಾಸ್ ಈ ವ್ಯಾಧಿಯಿಂದ ಮೃತಪಟ್ಟಾಗ ಆಕೆಯ ವಯಸ್ಸು ಕೇವಲ 58 ವರ್ಷಗಳಾಗಿತ್ತು!. ಇದಲ್ಲದೇ ಅನುವಂಶಿಕವಾಗಿ ಈ ವ್ಯಾಧಿಯು ಆಕೆಯನ್ನು ಬಾಧಿಸಿರಬಹುದೆನ್ನಲು, ಆಕೆಯ ಪೂರ್ವಜರಲ್ಲಿ ಯಾರೊಬ್ಬರಿಗೂ ಅಲ್ಜೀಮರ್ಸ್ ಕಾಯಿಲೆ ಇರಲೇ ಇಲ್ಲ. 

ಕರೋಲ್ ಕ್ರಾಸ್ ಳೊಂದಿಗೆ ಇದೇ ಹಳ್ಳಿಯ ಸುಮಾರು 20,000 ನಿವಾಸಿಗಳು, ಹಿಂದೆ ಸಂಭವಿಸಿದ್ದ ರಾಸಾಯನಿಕ ದುರಂತದ ದುಷ್ಪರಿಣಾಮಗಳಿಗೆ ಈಡಾಗಿದ್ದರು. 1988 ರಲ್ಲಿ ನಡೆದಿದ್ದ ಈ ದುರಂತದಲ್ಲಿ ಕೊಳಚೆ ನೀರನ್ನು ಶುದ್ಧೀಕರಿಸಲು ಬಳಸುವ "ಅಲ್ಯುಮಿನಿಯಂ ಸಲ್ಫೇಟ್" ದ್ರಾವಣವನ್ನು ಸಾಗಿಸುತ್ತಿದ್ದ ಲಾರಿಯ ಚಾಲಕನು, 20 ಟನ್ ಗಳಷ್ಟು ದ್ರಾವಣವನ್ನು ಕುಡಿಯುವ ನೀರಿನ ಸಂಗ್ರಹಾಗಾರಕ್ಕೆ ಆಕಸ್ಮಿಕವಾಗಿ ಸುರಿದಿದ್ದನು. ಈ ವಿಚಾರವನ್ನು ತಿಳಿಯದ ಅಮಾಯಕ ನಿವಾಸಿಗಳು, ಹಲವಾರು ವಾರಗಳ ಕಾಲ ಇದೇ ಕಲುಷಿತ ನೀರನ್ನು ಪ್ರತಿನಿತ್ಯ ಕುಡಿದಿದ್ದರು. ತತ್ಪರಿಣಾಮವಾಗಿ ಹಲವಾರು ವರ್ಷಗಳ ಬಳಿಕ ಈ ಹಳ್ಳಿಯ ಅನೇಕ ನಿವಾಸಿಗಳಿಗೆ "ಮರೆಗುಳಿತನ"ದ ತೊಂದರೆಗಳು ಆರಂಭವಾಗಿದ್ದವು. ಈ ಮರೆಗುಳಿತನವು ಅಲ್ಜೀಮರ್ಸ್ ಕಾಯಿಲೆಯ ಪ್ರಾಥಮಿಕ ಲಕ್ಷಣವೂ ಆಗಿದೆ. 

ಈ ಘಟನೆಯ ಬಗ್ಗೆ ಸವಿಸ್ತಾರವಾದ ಅಧ್ಯಯನವನ್ನು ನಡೆಸಿದ ಬಳಿಕ ಅಲ್ಯುಮಿನಿಯಂ ನಿಂದ ಅಲ್ಜೀಮರ್ಸ್ ಕಾಯಿಲೆ ಉದ್ಭವಿಸುವ ಸಾಧ್ಯತೆಗಳಿವೆ ಎಂದು ಕ್ರಿಸ್ಟೋಫಾರ್ ಎಕ್ಸ್ ಲೀ ಮತ್ತು ಮಾರ್ಗರೆಟ್ ಎಸಿರಿ ಸಂದೇಹಿಸಿದ್ದರು. ಆದರೆ ಈ ಅಧ್ಯಯನದ ವರದಿಗಳು ಪ್ರಕಟಗೊಂಡಿದ್ದ ಜರ್ನಲ್ ಆಫ್ ನ್ಯೂರಾಲಜಿ, ನ್ಯೂರೋ ಸರ್ಜರಿ ಎಂಡ್ ಸೈಕಿಯಾಟ್ರಿ ಎನ್ನುವ ಪತ್ರಿಕೆಯಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿದ್ದ ಡೇನಿಯಲ್ ಪರ್ಲ್ ಎನ್ನುವ ನ್ಯೂರಾಲಜಿಸ್ಟ್,ಇದನ್ನು ಅಲ್ಲಗಳೆದಿದ್ದರು. ಜೊತೆಗೆ ಈ ವಿಚಾರವು ವಿವಾದಾಸ್ಪದವಾಗಿರುವುದರಿಂದ,ಈ ಬಗ್ಗೆ ಖಚಿತವಾಗಿ ಏನನ್ನೂ ಹೇಳಲಾಗದು ಎಂದಿದ್ದರು. 

ಅದೇನೇ ಇರಲಿ, ಇಂತಹ ಅಧ್ಯಯನದ ವರದಿಗಳಿಂದಾಗಿ ಜನಸಾಮಾನ್ಯರು ಅಲ್ಯುಮಿನಿಯಂ ಪಾತ್ರೆಗಳನ್ನು ಬಳಸಲು ಅಂಜುವ ಸಾಧ್ಯತೆಗಳಿವೆ. ಆದರೆ ತಜ್ಞರು ಹೇಳುವಂತೆ ಅಡುಗೆಗಾಗಿ ಬಳಸುವ ಅಲ್ಯುಮಿನಿಯಂ ಪಾತ್ರೆಗಳು ಕರಗುವ ಸಾಧ್ಯತೆಗಳು ಇಲ್ಲದಿರುವುದರಿಂದ ಈ ಬಗ್ಗೆ ಹೆದರುವ ಅವಶ್ಯಕತೆಯಿಲ್ಲ. ಆದರೂ ಈ ಪಾತ್ರೆಗಳಲ್ಲಿ ಆಮ್ಲೀಯ ಗುಣವುಳ್ಳ (ಟೊಮೇಟೊ,ನಿಂಬೆ,ಅಂಬಟೆ ಇತ್ಯಾದಿ) ವಸ್ತುಗಳನ್ನು ಬೇಯಿಸಿದಲ್ಲಿ, ಇವುಗಳು ಅಲ್ಯುಮಿನಿಯಂ ನೊಂದಿಗೆ ಪ್ರತಿಕ್ರಿಯಿಸುವುದರಿಂದ ಕರಗಬಲ್ಲ ಈ ಲೋಹದ ಒಂದು ಅಂಶವು ನಿಮ್ಮ ಉದರವನ್ನು ಸೇರುವ ಸಾಧ್ಯತೆಗಳಿವೆ. ಇದೇ ಕಾರಣದಿಂದಾಗಿ ಆಮ್ಲೀಯ ಗುಣವುಳ್ಳ ಆಹಾರ ಪದಾರ್ಥಗಳನ್ನು ಬೇಯಿಸಲು  ಅಲ್ಯುಮಿನಿಯಂ ಪಾತ್ರೆಗಳನ್ನು ಬಳಸದೇ ಇರುವುದು ಹಿತಕರವೆನಿಸುವುದು. 

ಡಾ. ಸಿ. ನಿತ್ಯಾನಂದ ಪೈ,ಪುತ್ತೂರು