IODINE DEFICIENCY

 ಹಸುಗೂಸುಗಳನ್ನು ಬಾಧಿಸುವ ಅಯೋಡಿನ್ ಕೊರತೆ 

ತಾಯಿಯ ಎದೆಹಾಲು ಹಸುಗೂಸುಗಳ ಆರೋಗ್ಯದ ದೃಷ್ಟಿಯಿಂದ ಅಮೃತದಂತೆ ಪರಿಣಮಿಸುತ್ತದೆ ಎನ್ನುವುದು ನಿಮಗೂ ತಿಳಿದಿರಲೇಬೇಕು. ಆದರೆ ತಾಯಿಯ ಹಾಲಿನಲ್ಲಿ ಇರಬಹುದಾದ ರಾಸಾಯನಿಕವೊಂದು, ಪುಟ್ಟ ಕಂದನ ಪಾಲಿಗೆ ಅಪಾಯಕಾರಿಯಾಗಿ ಪರಿಣಮಿಸಬಲ್ಲದು ಎನ್ನುವ ವಿಚಾರ ನಿಮಗೂ ತಿಳಿದಿರಲಾರದು. ಈ ಬಗ್ಗೆ ಸಂಕ್ಷಿಪ್ತ ಮಾಹಿತಿ ಇಲ್ಲಿದೆ. 

ಹಲವಾರು ವರ್ಷಗಳ ಹಿಂದೆ ಜನಸಾಮಾನ್ಯರು ಬಳಸುತ್ತಿದ್ದ ಸಾಮಾನ್ಯ ಅಡುಗೆ ಉಪ್ಪಿನ ಬದಲಾಗಿ,ಅಯೋಡಿನ್ ಮಿಶ್ರಿತ ಉಪ್ಪನ್ನೇ ಕಡ್ಡಾಯವಾಗಿ ಮಾರಾಟ ಮಾಡುವಂತೆ ಸರ್ಕಾರ ಆದೇಶಿಸಿತ್ತು. ತತ್ಪರಿಣಾಮವಾಗಿ ಮಾರುಕಟ್ಟೆಯನ್ನು ಪ್ರವೇಶಿಸಿದ್ದ " ಅಯೋಡಿನ್ ಯುಕ್ತ ಉಪ್ಪು " ಶ್ರೀಸಾಮಾನ್ಯನ ಪಾಲಿಗೆ ದುಬಾರಿಯಾಗಿ ಪರಿಣಮಿಸಿತ್ತು!. 

ಅಯೋಡಿನ್ ಕೊರತೆ 

ಕಾರಣಾಂತರಗಳಿಂದ ಮನುಷ್ಯನ ಶರೀರದಲ್ಲಿ ಅಯೋಡಿನ್ ಕೊರತೆ ಉಂಟಾದಲ್ಲಿ ಉದ್ಭವಿಸಬಲ್ಲ ಆರೋಗ್ಯದ ಸಮಸ್ಯೆಗಳನ್ನು ತಡೆಗಟ್ಟುವ ಸಲುವಾಗಿ, ಕೇಂದ್ರ ಸರ್ಕಾರವು ಈ ನಿರ್ಧಾರವು ನಿಜಕ್ಕೂ ಅಪೇಕ್ಷಿತ ಪರಿಣಾಮವನ್ನು ತೋರಿದೆಯೇ ಎನ್ನುವ ಬಗ್ಗೆ ಯಾವುದೇ ಸಮೀಕ್ಷೆ- ಅಧ್ಯಯನಗಳನ್ನು ನಡೆಸಿಲ್ಲ. ಇದೇ ಕಾರಣದಿಂದಾಗಿ ಅಯೋಡಿನ್ ಯುಕ್ತ ಉಪ್ಪನ್ನೇ ಮಾರಾಟ ಮಾಡುವ ಪದ್ದತಿಯು ನಮ್ಮ ದೇಶದಲ್ಲಿ ಇಂದಿಗೂ ಮುಂದುವರೆದಿದೆ. 

ಆದರೆ ಪುಟ್ಟ ಕಂದಮ್ಮಗಳಲ್ಲಿ ಅಪರೂಪದಲ್ಲಿ ಕಾಣಿಸಬಲ್ಲ ಅಯೋಡಿನ್ ಕೊರತೆಗೆ ನಿರ್ದಿಷ್ಟ ಕಾರಣವೊಂದು ಇಂತಿದೆ. ಪರ್ ಕ್ಲೋರೇಟ್ ಎನ್ನುವ ಪ್ರದೂಷಕ ದ್ರವ್ಯವೇ ಈ ಸಮಸ್ಯೆಯ ಮೂಲವೆನಿಸಿದೆ. 

ಸಾಮಾನ್ಯವಾಗಿ ಹಸುಳೆಗೆ ಅತ್ಯವಶ್ಯಕ ಎನಿಸುವಷ್ಟು ಪ್ರಮಾಣದ ಅಯೋಡಿನ್ ತಾಯಿಯ ಹಾಲಿನಿಂದಲೇ ಲಭಿಸುತ್ತದೆ. ಆದರೂ ಅನೇಕ ಹಸುಗೂಸುಗಳಲ್ಲಿ ಅಯೋಡಿನ್ ಕೊರತೆಯುಂಟಾಗಲು ಎರಡು ಪ್ರಮುಖ ಕಾರಣಗಳಿವೆ. ಇವುಗಳಲ್ಲಿ ಮಗುವಿಗೆ ಮೊಲೆಹಾಲನ್ನು ಉಣಿಸುವ ತಾಯಂದಿರಲ್ಲಿ ಪೌಷ್ಠಿಕ ಅಂಶಗಳ ನ್ಯೂನತೆ ಮತ್ತು ಅಯೋಡಿನ್ ನ ಕೊರತೆ ಇರುವುದು ಅಥವಾ ತಾಯಿಯ ಹಾಲಿನಲ್ಲಿ ಇರುವ ಅಯೋಡಿನ್ ನ ಅಂಶವನ್ನು ಹೀರಿಕೊಳ್ಳಲು, ಹಸುಳೆಯ ಜೀರ್ಣಾಂಗಗಳು ವಿಫಲವಾಗುವುದೇ ಈ ಸಮಸ್ಯೆಯ ಮೂಲ ಕಾರಣಗಳಾಗಿವೆ. ಇವುಗಳಲ್ಲಿ ಎರಡನೆಯ ಕಾರಣವು "ಪರ್ ಕ್ಲೋರೇಟ್ ಅನ್ನುವ ರಾಸಾಯನಿಕದ ಪ್ರದೂಷಕ ಪರಿಣಾಮದಿಂದ ಸಂಭವಿಸುತ್ತದೆ. 

ಪರ್ ಕ್ಲೋರೇಟ್ ಎನ್ನುವ ಅಪಾಯಕಾರಿ ರಾಸಾಯನಿಕವನ್ನು ಪಟಾಕಿ,ಸಿಡಿಮದ್ದು, ಸ್ಪೋಟಕಗಳ ತಯಾರಿಕೆ ಮತ್ತು ರಾಕೆಟ್ ಗಳ ಇಂಧನವಾಗಿ ವ್ಯಾಪಕವಾಗಿ ಬಳಸಲಾಗುತ್ತದೆ. ಅನೇಕ ವರ್ಷಗಳಿಂದ ಈ ರಾಸಾಯನಿಕವನ್ನು ಅತಿಯಾಗಿ ಬಳಸಿರುವುದರಿಂದಾಗಿ, ನಾವು ಸೇವಿಸುತ್ತಿರುವ ನೀರು ಮತ್ತು ಆಹಾರ ಪದಾರ್ಥಗಳಲ್ಲಿ ಇದರ ಅಂಶ ಬೆರೆತಿರುವುದು ಪತ್ತೆಯಾಗುತ್ತಿದೆ. 

ಈ ರಾಸಾಯನಿಕದ ಪ್ರದೂಷಣೆಗೆ ಈಡಾಗಿರುವ ಮಾತೆಯರ ಶಿಶುಗಳು, ತಾಯಿಯ ಎದೆಹಾಲಿನಲ್ಲಿರುವ ಅಯೋಡಿನ್ ಅಂಶವನ್ನು ಹೀರಿಕೊಳ್ಳುವ ಸಾಮರ್ಥ್ಯದ ಬಗ್ಗೆ ವೈದ್ಯಕೀಯ ಅಧ್ಯಯನವನ್ನು ನಡೆಸಲಾಗಿತ್ತು. ಇದರ ಅಂಗವಾಗಿ ೧೩ ಬಾಣಂತಿಯರ ಎದೆಹಾಲಿನ ಮಾದರಿಗಳನ್ನು ಸಂಗ್ರಹಿಸಿ, ಇವುಗಲ್ಲಿರುವ ಅಯೋಡಿನ್ ಮತ್ತು ಪರ್ ಕ್ಲೋರೇಟ್ ಗಳ ಪ್ರಮಾಣವನ್ನು ಅಳೆಯಲಾಗಿತ್ತು. ಈ ಮಾದರಿಗಳಲ್ಲಿ ೧೨ ಮಾತೆಯರ ಎದೆಹಾಲಿನಲ್ಲಿ ಪರ್ ಕ್ಲೋರೇಟ್ ನ ಪ್ರಮಾಣವು ಅತ್ಯಧಿಕವಾಗಿದ್ದುದರಿಂದ, ೧೨ ಹಸುಳೆಗಳು ಅವಶ್ಯಕ ಪ್ರಮಾಣದ ಅಯೋಡಿನ್ ಹೀರಿಕೊಳ್ಳಲು ವಿಫಲವಾಗಿದ್ದವು. 

 ಅವಶ್ಯಕತೆ ಎಷ್ಟು ?

ವಾಷಿಂಗ್ಟನ್ ಡಿಸಿ ಯಲ್ಲಿರುವ ಇನ್ಸ್ಟಿಟ್ಯೂಟ್ ಆಫ್ ಮೆಡಿಸಿನ್ ಸಂಸ್ಥೆಯ ತಜ್ಞರ ಅಭಿಪ್ರಾಯದಂತೆ, ನವಜಾತ ಶಿಶುಗಳಿಗೆ ೬ ತಿಂಗಳು ತುಂಬುವ ತನಕ ಪ್ರತಿನಿತ್ಯ ೧೧೦ ಮೈಕ್ರೋ ಗ್ರಾಂ ಅಯೋಡಿನ್ ನ ಅವಶ್ಯಕತೆ ಇರುತ್ತದೆ. ಆದರೆ ತಾಯಿಯ ಹಾಲಿನಲ್ಲಿರುವ ಪರ್ ಕ್ಲೋರೇಟ್ ನ ದುಷ್ಪರಿಣಾಮದಿಂದಾಗಿ ಅನೇಕ  ಶಿಶುಗಳಿಗೆ ಕೇವಲ ೧೦ ರಿಂದ ೧೨ ಮೈಕ್ರೋ ಗ್ರಾಂ ಗಳಷ್ಟು ಅಯೋಡಿನ್ ಲಭಿಸುತ್ತಿದೆ. 

ಇದಲ್ಲದೇ ತಾಯಿಯ ಶರೀರದಲ್ಲಿರುವ ಅಯೋಡಿನ್ ನ ಶೇ. ೨೨ ರಷ್ಟು ಅಂಶವು ಎದೆಹಾಲಿನಲ್ಲೇ ಇರುವುದಾದರೂ, ಆಕೆಯ ಶರೀರದಲ್ಲಿರುವ ಪರ್ ಕ್ಲೋರೇಟ್ ನ ಶೇ. ೫೦ ರಷ್ಟು ಅಂಶವು ಎದೆಹಾಲನ್ನು ಸೇರುತ್ತದೆ. ತತ್ಪರಿಣಾಮವಾಗಿ ಈ ಹಸುಳೆಗಳ ತೂಕಕ್ಕೆ ಅನುಗುಣವಾಗಿ ೦.೨ ರಿಂದ ೦.೩ ಮೈಕ್ರೋ ಗ್ರಾಂ ನಷ್ಟು ಪರ್ ಕ್ಲೋರೇಟ್ ಪ್ರತಿನಿತ್ಯ ಇವುಗಳ ಉದರವನ್ನು ಸೇರುತ್ತದೆ!. 

ಅಯೋಡಿನ್ ನ ಕೊರತೆಯಿಂದಾಗಿ ಮನುಷ್ಯನ ಥೈರಾಯ್ಡ್ ಗ್ರಂಥಿಯ ಕಾರ್ಯಕ್ಷಮತೆಯಲ್ಲಿ ವ್ಯತ್ಯಯವಾಗುತ್ತದೆ. ಈ ಗ್ರಂಥಿಯು ಸ್ರವಿಸುವ ಥೈರಾಕ್ಸಿನ್ ಎನ್ನುವ ಹಾರ್ಮೋನ್ ಶಿಶುಗಳ ನರಮಂಡಲದ ಬೆಳವಣಿಗೆಯನ್ನು ನಿಯಂತ್ರಿಸುತ್ತದೆ. ಈ ಹಾರ್ಮೋನ್ ನ ಕೊರತೆಯಿಂದಾಗಿ ಶಿಶುಗಳ ಮಾನಸಿಕ ಬೆಳವಣಿಗೆ ಕುಂಠಿತಗೊಳ್ಳುವುದು, ಮೆದುಳಿಗೆ ಹಾನಿಯಾಗುವುದು ಮತ್ತು ಶಾರೀರಿಕ ಬೆಳವಣಿಗೆಯಲ್ಲಿ ವ್ಯತ್ಯಯಗಳು ಸಂಭವಿಸುವ ಸಾಧ್ಯತೆಗಳಿವೆ. ಇದರೊಂದಿಗೆ ಇಂತಹ ಶಿಶುಗಳು ಬದುಕಿ ಉಳಿಯುವ ಸಾಧ್ಯತೆಗಳೂ ಕಡಿಮೆಯಾಗುತ್ತವೆ. ಈ ಸಮಸ್ಯೆಯನ್ನು ನಿಯಂತ್ರಿಸುವ ಸಲುವಾಗಿಯೇ, ಭಾರತವೂ ಸೇರಿದಂತೆ ಜಗತ್ತಿನ ಬಹುತೇಕ ದೇಶಗಳಲ್ಲಿ ಅಯೋಡಿನ್ ಯುಕ್ತ ಉಪ್ಪಿನ ಮಾರಾಟವನ್ನು ಕಡ್ಡಾಯಗೊಳಿಸಲಾಗಿದೆ. 

ಡಾ.ಸಿ.ನಿತ್ಯಾನಂದ ಪೈ, ಪುತ್ತೂರು 

ಉದಯವಾಣಿ ಪತ್ರಿಕೆಯ ೦೨-೦೨-೨೦೧೧ ರ ಸಂಚಿಕೆಯಲ್ಲಿ ಪ್ರಕಟಿತ ಲೇಖನ.